ގެދޮރުވެރިކަމުގެ ސްކީމްގެ ދަށުން 4000 ޔުނިޓް ލިބޭ މީހުންގެ ލިސްޓާއި ގުޅިގެން ހުށަހެޅި ޝަކުވާތައް މި މަހުގެ ނިޔަލަށް ބަލައި ނިންމުމަށް މަސައްކަތް ކުރަމުންދާ ކަމަށް އިމާރާތްކުރުމާއި ގެދޮރުވެރިކަމާއި ބިނާވެށްޓާ ބެހޭ ވުޒާރާއިން ހާމަކޮށްފިއެވެ.

ވުޒާރާއިން ބުނީ، މި ސްކީމްގެ ދަށުން ފްލެޓް ލިބޭނެ ކަމަށް ކަނޑައެޅުނު 4000 މީހުންގެ ލިސްޓަށް ޝަކުވާ ހުށަހެޅުމުގެ މުއްދަތު ހަމަވެފައިވަނީ މިދިޔަ އޭޕްރީލް މަހުގެ 15 ވަނަ ދުވަހުގެ ނިޔަލަށެވެ. މި މުއްދަތުގައި ޖުމްލަ 8602 ޝަކުވާ ހުށަހެޅިފައިވާ ކަމަށް ވުޒާރާއިން ބުންޏެވެ.

ފްލެޓް ލިބޭ މީހުންގެ ލިސްޓް އަލުން ބަލަން ނިންމާފައިވަނީ، އާންމުންގެ ގިނަ ޝަކުވާތަކެއް ހުރި މައްސަލައަކަށް ވުމާއި، އަދި ފްލެޓް ލިބުނު މީހުންގެ ތެރޭގައި ޝަރުތު ހަމަނުވާ ގިނަ ބަޔަކު ހިމެނޭ ކަމަށް އެންޓި-ކޮރަޕްޝަން ކޮމިޝަނުގެ ތަޙުޤީޤުން ހާމަވުމާ ގުޅިގެންނެވެ. މި މައްސަލަ ބެލުމަށް ޚާއްޞަ ކޮމިޓީއެއް އެކުލަވާލައި، އެ ކޮމިޓީގެ ނިންމުންތަކަށް ބެލުމަށްފަހު، 4000 މީހުންގެ ތެރެއިން 2180 މީހުން ޝަރުތު ހަމަނުވާ ކަމަށް ވުޒާރާއިން ކުރިން ހާމަކޮށްފައިވެއެވެ.

ވުޒާރާއިން އިތުރަށް ބުނީ، ޝަކުވާތައް ހުށަހަޅާފައިވަނީ ތިން ގޮތަކަށެވެ. އެގޮތުން، ޕޯޓަލް މެދުވެރިކޮށް 5236 ޝަކުވާ، އީމެއިލް މެދުވެރިކޮށް 2840 ޝަކުވާ، އަދި ސިޓީ މެދުވެރިކޮށް 526 ޝަކުވާ ހުށަހަޅާފައިވެއެވެ.

މި ފަހަރު ޝަކުވާ ހުށަހެޅުމުގެ ފުރުޞަތު ހުޅުވާލިއިރު، އިތުރު ލިޔެކިޔުންތައް ހިމެނުމުގެ ފުރުޞަތު ދީފައެއް ނުވެއެވެ. ނަމަވެސް، ކޮންމެ ފަރާތަކަށްވެސް އެ ފަރާތަކުން ހިމަނަން ބޭނުންވާ މަޢުލޫމާތުތައް ލިޔެ ހުށަހެޅުމުގެ ފުރުޞަތު ދެވުނެވެ. ވުޒާރާއިން އިތުރަށް ބުނީ، ލިސްޓުގެ މައްސަލަ ބެލުމުގައި ބަލާފައިވަނީ 4000 ފްލެޓް ލިބޭނެ ކަމަށް ކުރީގެ ސަރުކާރުން 2023 ވަނަ އަހަރުގެ ނޮވެންބަރު 15 ވަނަ ދުވަހު ގެޒެޓުކުރި ލިސްޓަށް ކަމަށެވެ.