ޤައުމީ ތަރައްޤީގެ ސިޔާސަތުތައް ކަނޑައެޅުމުގައި ގުދުރަތީ ރައުސުލްމާލު ހިސާބުކިތާބުކުރުން ބޭނުންކުރެވޭނެ ގޮތްތަކާއި މިކަމުގެ ފައިދާތަކާއި ބެހޭގޮތުން ސަރުކާރުގެ ސިޔާސަތު ކަނޑައަޅާ ފަރާތްތަކަށް އަމާޒުކޮށްގެން ފަތުރުވެރިކަމާއި ތިމާވެއްޓާބެހޭ ވުޒާރާގެ ފަރާތުން މިއަދު ބައްދަލުވުމެއް ބާއްވައިފިއެވެ.

މި ބައްދަލުވުމުގައި ވަޒީރު ޠާރިޤް އިބްރާހިމް ވިދާޅުވީ ދިވެހިރާއްޖޭގެ ގުދުރަތީ ވަސީލަތްތަކަކީ ޤައުމުގެ އިޤްތިޞާދީ ކުރިއެރުމަށް ވަރަށް މުހިންމު ދައުރެއް އަދާކުރާ އަގުހުރި ވަސީލަތްތަކެއް ކަމަށާއި އަދި މި ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަކީ ވަރަށް މުހިންމު ކަމެއް ކަމުގައެވެ.

ބައްދަލުވުމުގައި ބައިވެރިވި ސަރުކާރުގެ އިސް ފަރާތްތަކަށް، ގުދުރަތީ ރައުސުލްމާލު ހިސާބުކިތާބުކުރުމުގެ މުހިންމުކަމާއި، މިކަމުން ލިބޭނެ ފައިދާތަކާއި ބެހޭ ގޮތުން މަޢުލޫމާތު ދީފައިވާ ކަމަށް ވުޒާރާއިން ބުންޏެވެ. މީގެ ތެރޭގައި ޤައުމުގެ ތިމާވެށި ރައްކާތެރިކުރުމާއި، އިޤްތިޞާދީ ކުރިއެރުން ހޯދުމުގައި ގުދުރަތީ ވަސީލަތްތަކުގެ މުހިންމުކަން ފާހަގަކުރެވުނު ކަމަށް ވުޒާރާއިން ބުންޏެވެ.

މި ބައްދަލުވުން ބާއްވާފައިވަނީ މި ސަރުކާރުން ތިމާވެށި ރައްކާތެރިކުރުމަށް ދެއްވާ އިސްކަމުގެ ދަށުން ކަމަށް ވުޒާރާއިން ބުނެފައިވެއެވެ.