ހުޅުމާލޭ ސެންޓްރަލް ޕާކުގައި ކުރިއަށްދާ ދިވެހީންގެ އުފެއްދުންތެރިކަމުގެ އެންމެ ބޮޑު މައުރަޒު ކަމަށްވާ "މޯލްޑިވްސް އެކްސްޕޯ 2025" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު މިރޭ ހުޅުވައިދެއްވައިފިއެވެ.
މި މައުރަޒަކީ ރާއްޖޭގެ އުފެއްދުންތެރިކަން އިތުރުކުރުމާއި ވިޔަފާރި ފުޅާކުރުމުގެ މަޤްޞަދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއި އިރުޝާދުގެ ދަށުން ބާއްވާ މައުރަޒެކެވެ. މިއީ އުފެއްދުންތެރިކަމުގެ ދާއިރާއަށް އަމާޒުކޮށްގެން ރާއްޖޭގައި ބޭއްވޭ އެންމެ ބޮޑު މައުރަޒެވެ.
މައުރަޒު ހުޅުވުމުގެ ރަސްމިއްޔާތުގައި ބޮޑުބެރާއި ތަފާތު އެކި ހަރަކާތްތައް ހިމެނުނެވެ. އަދި އެންމެ ޚާއްޞަ ހަރަކާތެއްގެ ގޮތުގައި ހަވާވެސް ވަނީ އަރުވާފައެވެ.
މައުރަޒު ރަސްމީކޮށް ހުޅުވައިދެއްވުމަށްފަހު ރައީސްގެ ދެކަނބަލުން ވަނީ މައުރަޒުގެ އެކި ސްޓޯލްތަކަށް ޒިޔާރަތްކުރައްވައި، އެ ސްޓޯލްތަކުގައި ކުރިއަށްދާ ކަންކަން ބައްލަވާލައްވާފައެވެ.
މި މައުރަޒުގައި އުފެއްދުންތެރި އިޤްތިޞާދީ ޑިސްޓްރިކްޓް، ޑިޖިޓަލް އަދި އީޖާދީ ޑިސްޓްރިކްޓް، މުނިފޫހިފިލުވުމުގެ ޑިސްޓްރިކްޓް އަދި ބާޒާރު ޑިސްޓްރިކްޓްގެ ނަމުގައި ޚާއްޞަ ސަރަޙައްދުތަކެއް ވަނީ ކަނޑައަޅާފައެވެ. މި ހުރިހާ ޑިސްޓްރިކްޓަކަށްވެސް ރައީސްގެ ދެކަނބަލުން ވަނީ ވަޑައިގެން އެތަނުގެ ކަންކަން ބައްލަވާލައްވާފައެވެ.
"މޯލްޑިވްސް އެކްސްޕޯ 2025" އަކީ ދިވެހީންގެ ޒަމާންވީ މަސައްކަތްތެރިކަމާއި އަދި ޒަމާނީ ފަންނުވެރިކަން ހިމެނޭހެން ދިވެހިރާއްޖޭގެ ހުރިހާ ކަންކޮޅުތަކެއްގެ ފަންނުވެރިންގެ ހުނަރުވެރި އުފެއްދުންތައް އެއްފުރާޅެއްގެ ދަށުން ދައްކުވައިދޭނެ މައުރަޒެކެވެ. މި މައުރަޒުގައި އުފެއްދުންތައް ދައްކާލުމުގެ އިތުރުން، ހުނަރުވެރިކަމާއި ފަންނުވެރިކަން އަދި އުފެއްއުފެއްދުންތެރިކަމުގެ ތަފާތު ތަޖުރިބާތަކެއް ކުރުމުގެ ފުރުޞަތު އާންމުންނަށް ލިބިގެންދާނެއެވެ.
މި މައުރަޒުގައި 200 އަށްވުރެ ގިނަ ސްޓޯލް ހިމެނޭއިރު، އޭގެ ތެރޭގައި ކުދި އަދި މެދު ފަންތީގެ ވިޔަފާރިތަކާއި، ސަރުކާރުގެ މުއައްސަސާތަކާއި، އަމިއްލަ ޖަމްޢިއްޔާތަކުގެ ސްޓޯލްތައް ހިމެނެއެވެ. މީގެ އިތުރުން، ތަފާތު މަސައްކަތު ބައްދަލުވުންތަކާއި ޕެނަލް ޑިސްކަޝަންތައްވެސް މި މައުރަޒުގައި ކުރިއަށްދާނެއެވެ.
"މޯލްޑިވްސް އެކްސްޕޯ 2025" ގައި ބައިވެރިވާ ފަރާތްތަކުގެ ތެރެއިން އެންމެ އުފެއްދުންތެރި އަދި އީޖާދީ އުފެއްދުންތައް ހުށަހަޅާ ފަރާތްތަކަށް ޚާއްޞަ އިނާމުތަކެއް ދިނުމަށްވެސް ވަނީ ހަމަޖެހިފައެވެ. މި މައުރަޒު ކުރިއަށްދާނީ މިއަދުން ފެށިގެން އަންނަ ހަފްތާގެ ނިޔަލަށެވެ.
