ދިވެހި އުފެއްދުންތެރިކަމުގެ މައުރަޒުގައި ބައިވެރިވެ، ދަނޑުވެރިކަމުގެ ދާއިރާއިން އައްޑޫ ސިޓީ ކައުންސިލުން ހޯދި ފުރިހަމަ ކާމިޔާބީއަކީ، ދަނޑުވެރިކަމުގެ ސިނާއަތް ކުރިއެރުވުމަށް އެ ސިޓީގެ ރައްޔިތުންގެ ހިތުގައި އޮތް ލޯތްބާއި ޝައުގުގެ ދިރިހުރި ހެއްކެއްކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.
ސޯޝަލް ސެންޓަރުގައި ރޭ ބޭއްވި ދިވެހި އުފެއްދުންތެރިކަމުގެ މައުރަޒު 2025ގެ އިނާމު ދިނުމުގެ ޖަލްސާގައި، އައްޑޫ ސިޓީން ހޯދި ފަހުރުވެރި އެއްވަނައަށް ތަހުނިޔާ ވިދާޅުވަމުން، އައްޑޫ އަކީ ދަނޑުވެރިކަމުގެ ސިނާއަތް ކުރިއެރުވުމަށް ކުރައްވަމުން ގެންދަވާ މަސައްކަތްތަކުގެ ދިރުންހުރި ހެއްކެއް ކަމަށް އެ ކަމަނާ ވިދާޅުވިއެވެ.
މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. ރައީސް ވަނީ އެކި އެކި ދާއިރާތަކުން 1 ވަނަ ހާސިލުކުރި ފަރާތްތަކަށާއި، މުޅި މައުރަޒުން އެންމެ މަތިން މާކްސް ހޯދި 5 ފަރާތަކަށް ރަން ވަނަ ހަވާލުކޮށްދެއްވާފައެވެ.
މުޅި މައުރަޒުން އެއްވަނަ އައްޑޫ ސިޓީ ހިތަދޫއަށް ލިބިފައިވާއިރު، އައްޑޫ ސިޓީ ކައުންސިލަށް ވަނީ ސިޓީ ފެންވަރުގައި ތަކެތި ބައިވެރިކުރުމުގެ ދާއިރާއިން އެއްވަނަ ލިބިފައެވެ.
ވަޒީރު މާރިޔާ އިތުރަށް ވިދާޅުވީ މިއީ ގައުމީ ފެންވަރުގައި ދަނޑުވެރިކަމުގެ ދާއިރާ ކުރިއެރުވުމަށް މަގުފަހިކޮށްދޭނެ ރަމްޒީ ނަމޫނާއެއް ކަމަށެވެ.
