އަމިއްލަ ކުންފުންޏެއް ކަމަށްވާ ސެންޓަރ އެންޓަޕްރައިސަސްއިން ދައުލަތުގެ މައްޗަށް ހުށަހެޅި ދަޢުވާތަކެއްގައި ސައްޙަނޫން ލިޔުންތަކެއް ބޭނުންކޮށްފައިވާ ކަމަށް ތުހުމަތުކުރެވޭތީ، އެ މައްސަލައިގެ ޖިނާއީ ތަޙްޤީޤެއް ހިންގުމަށް ފުލުހުންނަށް ހުށަހަޅާފައިވާ ކަމަށް ބަންޑާރަނައިބުގެ އޮފީހުން ހާމަކުރައްވައިފިއެވެ.
ސެންޓަރ އެންޓަޕްރައިސަސްއިން 2006 އާއި 2008 ގައި ދައުލަތަށް ފޯރުކޮށްދިން ކަމަށް ބުނާ ޚިދުމަތްތަކަށް ފައިސާ ހޯދުމަށް ސިވިލް ކޯޓަށް ހުށަހެޅި 3 މައްސަލައިގެ ތެރެއިން 2 މައްސަލައެއްގައި ސައްޙަނޫން ލިޔެކިޔުންތަކެއް ހުށަހަޅާފައިވާ ކަމަށް ޤަބޫލުކުރެވޭ ކަމަށް ބަންޑާރަނައިބުގެ އޮފީހުން ބުނެފައިވެއެވެ.
މި މައްސަލަތަކުގެ ތެރޭގައި ތިމާވެށްޓާބެހޭ ވުޒާރާއަށް ސަޕްލައިކޮށްދިން ކަމަށް ބުނާ ކަޅުހަންތަކަކާއި ގުޅޭ މައްސަލައަކާއި، ޑިޕާޓްމަންޓް އޮފް މެޑިކަލް ސަރވިސަސްއަށް ސަޕްލައިކުރި ކަމަށް ބުނާ މެޑިކަލް އިކުއިޕްމަންޓްތަކަކާއި ގުޅޭ 2 މައްސަލަ ހިމެނެއެވެ.
އޮޑިޓަރ ޖެނެރަލްގެ އޮފީހުން ކުރި ޚާއްސަ އޮޑިޓެއްގައި، ސެންޓަރ އެންޓަޕްރައިސަސްއިން ސިވިލް ކޯޓަށް ސައްޙަނޫން އިންވޮއިސްއެއް ހުށަހަޅާފައިވާ ކަމާއި، ދިވެހިރާއްޖެއަށް އެތެރެކޮށްފައިނުވާ ބައެއް މެޑިކަލް އިކުއިޕްމަންޓްތައް ޑިޕާޓްމަންޓް އޮފް މެޑިކަލް ސަރވިސަސްއަށް ސަޕްލައިކޮށްދީފައިވާ ކަމަށް ހުށަހަޅާފައިވާ ލިޔުންތަކުގައި ބަޔާންކޮށްފައިވާކަން ފާހަގަކުރެވިފައިވެއެވެ.
މި މައްސަލަތަކާ ގުޅިގެން ސިވިލް ކޯޓުންނާއި ދިވެހިރާއްޖޭގެ ހައިކޯޓުން ނިންމާފައިވާ ނިންމުންތައް ދައުލަތުން ވަނީ އިސްތިއުނާފުކޮށްފައެވެ. އަދި އޮޑިޓަރ ޖެނެރަލްގެ އޮފީހުގެ ލަފާގެ މަތިން، މި މައްސަލަތަކާއި ގުޅިގެން ޖިނާއީ ތަޙްޤީޤެއް ކުރިއަށް ގެންދިއުމަށް ބަންޑާރަނައިބުގެ އޮފީހުން ވަނީ ނިންމާފައެވެ.
