ޓެކްނޮލޮޖީ ކުރިއަރައި ދިރިއުޅުމުގައި ވަގުތު ސަލާމްކުރެވޭނެ ގޮތް ފެނިއްޖެއެވެ. ރާއްޖޭގައި މިހާރު ދުވަހު ނޫސްތަކުން ފެށިގެން އަމިއްލަ ކުންފުނިތަކާއި ކޮލެޖުތަކާއި ސްކޫލްތަކުގެ އިތުރުން މިނިސްޓްރީ ތަކާއި ވުޒާރާތަކުގައި ވެސް ޖެނެރޭޓިވް އާޓިފިޝަލް އިންޓެލިޖެންސް މަޤްބޫލުވެއްޖެއެވެ. މިއީ އެއްގޮތަކުން ބަލާކަމުގައި ވަނީނަމަ ކުރިއެރުމެކެވެ. އަނެއް ނަޒަރުން ބަލާނަމަ ގިނަ ބަޔަކު ފަޤީރުކޮށްލާނެ ބިރެކެވެ.
އިންޓަނޭޝަނަލް ލޭބަރ އޯގަނައިޒޭޝަން (އައިއެލްއޯ) އާއި ޕޮލެންޑްގެ ނެޝަނަލް ރިސާރޗް އިންސްޓިޓިއުޓް (އެންއޭއެސްކޭ) އިން އާންމުކޮށްފައިވާ ރިޕޯޓެއް އަޅުގަނޑު ކިޔައިލީމެވެ. އެ ރިޕޯޓުގައި ބުނެފައިވާ ގޮތުގައި ދުނިޔޭގެ އެކި ކަންކޮޅުތަކުގައި ވަޒީފާ އަދާކުރާ މީހުންގެ ތެރެއިން 25 ޕަސަންޓު މީހުންގެ ވަޒީފާއަކީ އޭއައިގެ ސަބަބުން ހަމަ ޔަޤީން ކަށަވަރުކަމާއެކު ނުރައްކަލުގައި ޖެހިދާނެ ވަޒީފާތަކެކެވެ. މީގެ ތެރޭގައި އެންމެ ބޮޑު ބިރަކާއި ކުރިމަތިލާން ޖެހޭނީ އޮފީސް ތަކުގައި އުޅޭ މީހުންނާއި ޑިޖިޓަލް ދާއިރާގައި ޙަރަކާތްތެރިވާ މީހުން ކަމުގައި އެ ރިޕޯޓުގައި ބުނެފައިވެއެވެ.
"ޖެނެރޭޓިވް އޭއައި އެންޑް ޖޮބްސް: އަ ރިފައިންޑް ގްލޯބަލް އިންޑެކްސް އޮފް އޮކިއުޕޭޝަނަލް އެކްސްޕޯޝަރ" މި ނަމުގައި ނެރެފައިވާ މި ރިޕޯޓަކީ ޖެންއޭއައިގެ ސަބަބުން ވަޒީފާތަކަށް އަންނާނެ ބަދަލުތަކާއި ގުޅޭގޮތުން މިހާތަނަށް ދުނިޔޭގައި ނެރެފައިވާ އެންމެ ތަފްސީލީ ދިރާސާ ކަމަށް ބެލެވެއެވެ.
Advertisement
ނަމަވެސް މި ދިރާސާއިން ދައްކާގޮތުގައި ޖެންއޭއައިގެ ސަބަބުން ވަޒީފާތައް ގެއްލުމަށްވުރެ ބޮޑަށް ވަޒީފާތަކަށް ބަދަލު އަންނާނެ ކަމަށް ލަފާ ކޮށްފައި ވެއެވެ.
އެންމެ ބޮޑު ނުރައްކަލެއް އޮތީ ކުރިއަރާފައިވާ ޤައުމުތަކަށް
މި ދިރާސާއިން ދައްކާގޮތުގައި ޖެންއޭއައިގެ ސަބަބުން ނުރައްކަލުގައި ޖެހޭ މިންވަރު 25 އިންސައްތައިގައި ހުރި ނަމަވެސް، ދުނިޔޭގައި އެންމެ ބޮޑަށް ތަރައްޤީ ވެފައިވާ އަދި މުވައްޒަފުންނަށް ބޮޑު މުސާރަ ލިބޭ ގައުމުތަކުގައި ވަޒީފާގެ އާބާދީ ގެއްލޭ މިންވަރު 34 ޕަސަންޓަށް އަރާނެ ކަމަށް ލަފާ ކޮށްފައި ވެއެވެ. ސަބަބަކީ އެ ގައުމުތަކުގައި ޑިޖިޓަލް ޓެކްނޮލޮޖީ ބޭނުންކުރާ މިންވަރު މަތިވުމުގެ ސަބަބުންނެވެ.
ކަށަވަރު ކަމާއިއެކު ފާހަގަ ކުރެވޭ ކަމަކީ އެފަދަ ޤައުމުތަކުގައި އޮފީސް ތަކާއި ފެކްޓަރީ ތަކުގެ އިދާރީ އަދި ޑޭޓާ އެންޓްރީ ކުރުން ފަދަ ގިނަ މަސައްކަތްތައް ކުރާނީ އޭއައި ޓެކްނޮލޮޖީގެ އެހީގައެވެ. އެހެންކަމުން އެ ވަޒީފާތަކަށް އިންސާނުންގެ ބޭނުމެއް ނެތެވެ. މީގެ އިތުރުން މީޑިއާ، ސޮފްޓްވެއަރ ޑިވެލޮޕްމަންޓް އަދި ފައިސާއާއި ގުޅޭ ދާއިރާގެ ވަޒީފާތަކަށް ވެސް ބޮޑު ނުރައްކަލެއް ކުރިމަތިވެދާނެ ކަމަށް އެ ރިޕޯޓުގައި ފާހަގަ ކޮށްފައި ވެއެވެ.
ފާހަގަ ކޮށްލަން ޖެހޭ ކަމަކީ، މި ދިރާސާއަކީ އިންޓަނޭޝަނަލް މަނިޓަރީ ފަންޑް (އައިއެމްއެފް) އިން މިދިޔަ އަހަރު ކުރި އެސެސްމަންޓާއި އެއްގޮތް ދިރާސާއެކެވެ. އައިއެމްއެފްގެ އެސެސްމަންޓުގައި ބުނެފައިވަނީ އޭއައިގެ ސަބަބުން ދުނިޔޭގެ އެކި ކަންކޮޅުތަކުގައި ވަޒީފާ އަދާކުރާ 40 ޕަސަންޓް މީހުންނަށް އަސަރުކުރާނެ ކަމަށެވެ. އެ ރިޕޯޓުގައި ވެސް އެންމެ ބޮޑު އަސަރެއް ކުރާނީ ތަރައްޤީވެފައިވާ އިޤްތިޞާދުތަކަށް ކަމަށް ބުނެފައި ވެއެވެ. އެހެންކަމުން އާޓިފިޝަލް އިންޓެލިޖެންސްގެ ސަބަބުން އެތައް މިލިޔަން މީހުން ފަޤީރު ވެދާނެ ކަމުގެ ބިރު އެބައޮތެވެ.
