ރަސްމާލެ މަޝްރޫއުގެ ދަށުން ބޭރުގެ ކުންފުނިތަކަށް ނުވަތަ އިންވެސްޓަރުންނަށް ބިން "މިލްކު" ކުރެވޭ ގޮތަށް ބިން ނުވިއްކާނެއެވެ. ،އެ ތަނުން ބިން ދިން ނަމަވެސް އަސްލު މިލްކުވެރިކަން އަބަދުވެސް އޮންނާނީ ދައުލަތުގެ މިލްކެއްގެ ގޮތުގައި ކަމަށް ސަރުކާރުން ވަނީ ބުނެފައެވެ.
މިކަމާ ގުޅޭގޮތުން ފިނޭންސް މިނިސްޓަރު ވިދާޅުވީ، ރަސްމާލެ ތަރައްގީ ކުރުމުގެ ބިޔަ މަޝްރޫއު ކުރިއަށްދާނީ ރާއްޖޭގެ ގާނޫނީ އިމުގެ ތެރެއިން ކަމަށާއި، ރާއްޖޭގެ ބިމުން އެއްވެސް ބައެއް ބޭރުގެ ފަރާތްތަކަށް މިލްކުކޮށް ނުދެވޭނެ ކަމަށެވެ. ސޯޝަލް މީޑިއާގައި ދެކެވޭ ވާހަކަތަކަށް ރައްދު ދެއްވަމުން މިނިސްޓަރު ވަނީ ބިން މިލްކުކޮށްދޭ ގޮތަށް އިންވެސްޓަރުންނަށް ބިން ވިއްކާ ކަމަށް ބުނާ ވާހަކަތައް ދޮގުކުރައްވާފައެވެ.
ސަރުކާރުން ބަޔާންކުރާ ގޮތުގައި، ރަސްމާލެއިން ބިންތައް ދޫކުރާނީ ގާނޫނުއަސާސީ އާއި ގަވާއިދުތަކާ އެއްގޮތްވާ ގޮތުގެ މަތިން 99 އަހަރުގެ ދިގު މުއްދަތަކަށް ކުއްޔަށް (ލީސް) ދޭ އުސޫލުންނެވެ. މިގޮތަށް ދޫކުރާ ބިމެއްގައި އިންވެސްޓަރުން ހަދާ ހޮޓާ، ލަކްޝަރީ ރެސިޑެންސް ނުވަތަ ވިޔަފާރި އިމާރާތްތަކުގެ "ކުލީގެ ހައްގު' ނުވަތަ ޕްރޮޕަޓީ އެހެން ފަރާތްތަކަށް ވިއްކުމުގެ ފުރުސަތު އޮތް ނަމަވެސް، އެއީ ބިމުގެ އަސްލު މިލްކުވެރިކަން ދިނުން ނޫން ކަމަށް ސަރުކާރުން ސާފުކޮށްދެއެވެ.
Advertisement
އެހެންކަމުން، އެފަދަ ޕްރޮޕަޓީއެއް އެހެން މީހަކަށް އަލުން ދިގުމުއްދަތަކަށް ދިން ކަމުގައި ވިޔަސް، ބިމުގެ އަސްލު ސިޔާދަތީ ބާރާއި މިލްކުވެރިކަން ދެމިއޮންނާނީ ދިވެހި ދައުލަތުގެ އަތްމަތީގައެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ މި މަޝްރޫއަކީ ދިވެހި ދައުލަތަށް އެއްވެސް ލޯނެއް ނުވަތަ ސަވަރިން ގެރެންޓީއެއް ނުދީ، ރާއްޖޭގެ މިނިވަންކަމަށް އެއްވެސް އަސަރެއް ނުފޯރާނެ ގޮތަށް ކުރިއަށްގެންދާ މަޝްރޫއެއްކަމުގެ ޔަގީންކަން ދެއްވާފައެވެ.
މި މަޝްރޫއުގެ ސަބަބުން ރާއްޖެއަށް ގިނަ އަދަދެއްގެ ވަޒީފާގެ ފުރުސަތުތަކާއި އިގްތިސާދީ ކުރިއެރުން ލިބިގެންދާނެ ކަމަށާއި، ދިވެހި ރައްޔިތުންގެ ބޯހިޔާވަހިކަމުގެ ހައްގުތަކަށް އެއްވެސް އުނިކަމެއް ނާންނާނެ ކަމަށް ރައީސް ވިދާޅުވިއެވެ.
ރަސްމާލެއަކީ މާލެ ސަރަހައްދުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށްޓަކައި ތަރައްގީކުރާ ރާއްޖޭގެ އެންމެ ބޮޑު އިކޯ-ސިޓީއެވެ.
ޔޫއޭއީގެ އީގަލް ހިލްސްއާ އެކު ވެފައިވާ އެއްބަސްވުމުގެ ދަށުން ލީސްހޯލްޑް އުސޫލުން ބިންތައް ދޫކޮށް 5,000 ބޯހިޔާވަހިކަމުގެ ޔުނިޓް ތަރައްގީ ކުރުމަށް ވަނީ ހަމަޖެހިފައެވެ.
