ޣައްޒާގައި ހިނގަމުންދާ ހަނގުރާމަ އިތުރަށް ވަރުގަދަވެ އިސްރާއީލުގެ ވައިގެ ހަމަލާތަކުން މިއަދުވެސް 90 އަށްވުރެ ގިނަ ފަލަސްތީނު ރައްޔިތުން ޝަހީދުކޮށްލައިފިއެވެ. ރިޕޯޓްތައް ބުނާ ގޮތުގައި ޝަހީދުވި މީހުންގެ ތެރޭގައި ގިނަ އަދަދެއްގެ ކުޑަކުދިން ހިމެނެއެވެ.
ރޭ ފަތިހު އިސްރާއީލުގެ މަތިންދާބޯޓުތަކުން ޣައްޒާގެ އެކި ސަރަޙައްދުތަކުގައި ހުރި އަވަށްތަކަށް ހަމަލާދީފައިވެއެވެ. އުތުރު ޣައްޒާގެ ޖަބާލިއާ އަލް-ބަލަދުގައި ހުންނަ ގެއަކަށް އަމާޒުކޮށް އެތަން ފުނޑުފުނޑުކޮށްލަން ދިން ހަމަލާއެއްގައި 11 މީހުން ޝަހީދުވެ 13 މީހުން ޒަޚަމްވިއެވެ. މީގެ އިތުރުން ޣައްޒާގެ ދައިރު އަލް-ބަލަޙްގައި ހުންނަ ގެއަކަށް ދިން ބޮމު ހަމަލާއެއްގައި އެތަނުން ވެސް ފަސް މީހުން ޝަހީދުވިއެވެ. މީގެ ތެރޭގައި 4 ކުޑަކުދިން ހިމެނެއެވެ. އަދި ދެކުނު ޣައްޒާގެ ޚާން ޔޫނިސްގެ އަބަސާން އަލް-ކަބީރާ އާއި މަޢާން ސަރަޙައްދުގެ ގޭގެއަށް ދިން ހަމަލާތަކުގައި ވެސް އިތުރު ހަތް މީހުން ޝަހީދުވިއިރު އިތުރު އެހެން ތަންތަނުން ގިނަ ބަޔަކު ޝަހީދު ކޮށްލި ކަމަށް މަސްދަރުތަކުން ބުނެއެވެ.
ޣައްޒާގެ ސިއްޙީ މިނިސްޓްރީން ބުނާ ގޮތުގައި 24 ގަޑިއިރުގެ ތެރޭގައި 90 މީހުން ޝަހީދުވެ 290 މީހުން ޒަޚަމްވެފައިވެއެވެ.
މި ހަމަލާތަކުން ޣައްޒާގެ އިންސާނީ ހާލަތު އިތުރަށް ގޯސްވެފައިވެއެވެ. އދ. އިން އިންޒާރުދީފައިވާ ގޮތުގައި ކުރިޔަށް އޮތް ދެތިންދުވަހު 14،000 އަށްވުރެ ގިނަ ކުޑަކުދިން ބަނޑުހައިވުމުގެ ނުރައްކަލާ ކުރިމަތިލާން ޖެހި މަރުވެދާނެ ކަމުގެ ބިރު އެބަ އޮތެވެ.
ހަނގުރާމަ ހުއްޓާލުމަށް ބައިނަލްއަޤްވާމީ ފަރާތްތަކުން ގޮވާލަމުންދިޔަ ނަމަވެސް، އިސްރާއީލުން ވަނީ ޣައްޒާގައި އެ ޤައުމުގެ އެއްގަމު ހަމަލާތައް އިތުރުކުރުމަށް ނިންމާފައެވެ.
މި ހަނގުރާމަ ފެށުނުތާ 20 މަސް ވެފައިވާއިރު، ޣައްޒާގައި ޝަހީދުވި މީހުންގެ އަދަދު ވަނީ 60،000 އަށްވުރެ މައްޗަށް އަރާ ކަމަށް ބައެއް މަސްދަރުތަކުން ރިޕޯޓް ކުރެއެވެ. މީގެ ތެރެއިން ގިނަ އަދަދެއްގެ މީހުންނަކީ އަންހެނުންނާއި ކުޑަކުދިންނެވެ.
