ހުޅަނގުގެ ހުރިހާ ބާރުތަކާއި ދެކޮޅަށް ތެދުވެގެން އުޅޭ ޔަމަނުގައި ހަރަކާތްތެރިވާ ހޫޘީން އިސްރާއީލުގެ ޚައިފާ ބަނދަރަށް ކަނޑުމަގުން ދަތުރުކުރެވެން އޮތް ހުރިހާ މަގެއް ބަންދުކޮށްފިއެވެ. މިއީ ފަލަސްޠީނުގެ ރައްޔިތުންގެ ޙައްޤުގައި ޙޫޘީ ޖަމާޢަތުން އަޅާފައިވާ ފިޔަވަޅެއް ކަމަށް އެ ޖަމާޢަތުން ބުނެފައިވެއެވެ.
ޙޫޘީ ޖަމާޢަތުގެ ތަރުޖަމާނު ޔަޙްޔާ ސަރީޢު ޤާސިމް ވިދާޅުވި ގޮތުގައި، ޚައިފާ ބަނދަރަށް ދަތުރުކުރާ އަދި އެ ބަނދަރުން ފުރައިގެންދާ ހުރިހާ އުޅަނދަކީ އެ ޖަމާޢަތުގެ ނުރައްކާތެރި ޙަމަލާތަކުގެ އަމާޒަކަށް ހަދާފައިވާ އުޅަނދުތަކެކެވެ. މިއީ ޣައްޒާގެ ރައްޔިތުންގެ ނަސްލު ނައްތައިލުމަށް ޔަހޫދީ ފައުޖުން ހިންގަމުންދާ ޤަތުލުޢާންމާއި ގުޅިގެން އަޅާފައިވާ ފިޔަވަޅެއް ކަމަށްވެސް އެ ޖަމާޢަތުން ބުނެފައިވެއެވެ.
ޙޫޘީންގެ މި ފިޔަވަޅަކީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު ޣައްޒާގައި ފެށުނު ޔަހޫދީ ފައުޖުގެ ޤަތުލުޢާންމާ ގުޅިގެން، އޭގެ ބަދަލު ހިފުމުގެ ގޮތުން ފަށާފައިވާ އަސްކަރީ އޮޕަރޭޝަނުގެ ބައެކެވެ. ޙޫޘީންގެ މަޤްޞަދަކީ ފަލަސްޠީނުގެ މިނިވަންކަމަށް ޖިހާދުކުރަމުންދާ ޖަމާޢަތްތަކާއި ފަލަސްޠީނުގެ ރައްޔިތުންނަށް ވާގިވެރިވުމާއި، ޔަހޫދީންގެ ޢުދުވާނީ ޙަމަލާތައް ހުއްޓުވުމެވެ.
ރަތްކަނޑުން ދަތުރުކުރަމުންދާ ކްރޫޒް ޝިޕެއް: ހޫޡީން ހަމަލާ ދެމުންދާތީވެ، ހައިފާ ބަނދަރަށް ދިޔުމަށް ޝިޕިންގލައިން ތަކުން މިހާރު ޖެހިލުންވޭ. / ފޮޓޯ: ރޮއިޓާސް
މި އޮޕަރޭޝަނުގެ ދަށުން ޙޫޘީން ވަނީ އިސްރާއީލުގެ އެކި ސަރަޙައްދުތަކަށާއި، އެ ޤައުމުގެ މަޞްލަޙަތު އޮތް އުޅަނދުފަހަރަށް މިސައިލްތަކާއި އަސްކަރީ ޑްރޯންތައް ބޭނުންކޮށްގެން ޙަމަލާދީފައެވެ. އޭގެ ތެރޭގައި އިސްރާއީލުގެ މައި ވައިގެ ބަނދަރު ކަމަށްވާ ބެން ގޫރިޔޮން ވައިގެ ބަނދަރު އޮންނަ ސަރަޙައްދަށް ދީފައިވާ ޙަމަލާތައްވެސް ހިމެނެއެވެ.
ކުރިން ޙޫޘީން ވަނީ ރަތު ކަނޑު ހުރަސްކޮށް ދަތުރުކުރާ އާގުބޯޓުފަހަރަށްވެސް ޙަމަލާދީފައެވެ. ނަމަވެސް، އެމެރިކާއާއެކު ވެފައިވާ އެއްބަސްވުމަކާ ގުޅިގެން އެ ސަރަޙައްދުގައި ހިންގަމުންދިޔަ އޮޕަރޭޝަން ވަނީ މެދުކަނޑާލާފައެވެ.
ޙޫޘީންގެ ޙަމަލާތަކުގެ ބަދަލު ހިފުމުގެ ގޮތުން އިސްރާއީލުން ވެސް ވަނީ ޔަމަނުގެ އެކި ސަރަޙައްދުތަކަށް ޙަމަލާދީފައެވެ. މީގެ ތެރޭގައި ޔަމަނުގެ ވެރިރަށް ޞަންޢާގެ މައި ވައިގެ ބަނދަރަށާއި އަލް-ޙުދައިދާގައި އޮތް ދެ ބަނދަރަކަށް ދީފައިވާ ޙަމަލާތައް ހިމެނެއެވެ.
މި ހަނގުރާމައިގެ ސަބަބުން ބައިނަލްއަޤްވާމީ ކަނޑުދަތުރުފަތުރަށް ބޮޑެތި އަސަރުތަކެއް ކުރަމުންދާއިރު، ދުނިޔޭގެ ގިނަ ޤައުމުތަކުން ވަނީ މި ކަމާމެދު ކަންބޮޑުވުން ފާޅުކޮށްފައެވެ. ޚާއްޞަކޮށް ރަތު ކަނޑުގެ ސަރަޙައްދުގައި ހިނގަމުންދާ ޙަމަލާތަކުގެކުގެ ސަބަބުން ވިޔަފާރިއަށް ކުރަމުންދާ ނޭދެވޭ އަސަރުތސަރުތަކާ ގުޅޭގޮތުން ބައިނަލްއަޤްވާމީ ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
މި ހާލަތުގައި، ޙޫޘީންގެ އަމަލުތަކަކީ ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން ކުރާ ކަމެއްކަމަށް އެ ޖަމާޢަތުން ބުނަމުންދާއިރު، އިސްރާއީލާއި އެމެރިކާ ފަދަ ޤައުމުތަކުން މިއީ ބައިނަލްއަޤްވާމީ ޤާނޫނާ ޚިލާފު އަމަލުތަކެއް ކަމަށް ބުނެ، ޙޫޘީންގެ މައްޗަށް އިތުރު ފިޔަވަޅުތައް އަޅަމުންދެއެވެ. ނަމަވެސް ހޫޘީން އެކަމަށް ފަރުވާލެއް ނުބަހައްޓައެވެ.
