ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހެޅިފައިވާ ހައި ކޯޓުގެ ފަނޑިޔާރު މުހައްމަދު ނިޔާޒާއި ސިވިލް ކޯޓުގެ ގާޒީ ފަރުހާދު ރަޝީދާ ގުޅޭ ސުލޫކީ މައްސަލަތަކެއް ބެލުމަށް ޖޭއެސްސީގެ މައްސަލަ ބެލުމާ މެދު ގޮތެއް ނިންމާ ކޮމިޓީން މަސައްކަތް ފަށައިފިއެވެ.
އެނގިފައިވާ ގޮތުގައި އެމްޑީޕީއާއި ގުޅުން އޮންނަ ފަނޑިޔާރު ނިޔާޒާއި ގުޅޭ ގޮތުން އަމިއްލަ ފަރާތަކުން ހުށަހަޅާފައިވަނީ ދެ މައްސަލައެކެވެ. މީގެ ތެރޭގައި އޭނާ މެޖިސްޓްރޭޓްކަން ކުރެއްވި ދުވަސްވަރުގެ މައްސަލައެއްވެސް ހިމެނެއެވެ. މި ދެ މައްސަލައަކީވެސް ކުރިން ޖޭއެސްސީން ނުބަލަން ނިންމާފައިވާ މައްސަލަތަކެކެވެ. ފަނޑިޔާރު މާނިއު މައްސަލައެއްވެސް ވަނީ ޖޭއެސްސީއަށް ހުށަހަޅާފައެވެ. ނަމަވެސް މާނިއުއާއި ގުޅޭ ސުލޫކީ މައްސަލައާއި ބެހޭގޮތުން ޖޭއެސްސީން ވަކިއެއްޗެއް ހާމަކޮށްފައެއް ނުވެއެވެ.
ގާޒީ ފަރުހާދާ ގުޅޭ ގޮތުން ހުށަހެޅިފައިވަނީ ޑިސްޕިއުޓް މަރުހަލާގައި ނިންމި ނިންމުމެއްގައި އޮތް ލިޔުމުގެ ކުށެއްގެ މައްސަލައެކެވެ. މި މައްސަލައަކީވެސް ހައި ކޯޓުގެ ސަމާލުކަމަށް ގެނެވި، ލިޔުމުގެ ކުށެއްކަމަށް ނިންމައި، ފަހުން އިސްލާހުކުރެވިފައިވާ މައްސަލައެކެވެ. އަދި މިއީވެސް ޖޭއެސްސީން ކުރިން ގޮތް ކަނޑައަޅާފައި އޮތް މައްސަލައެކެވެ.
ނަމަވެސް، މި ތިން މައްސަލަ އަލުން ބަލަން ފަށާފައިވާކަން ފާހަގަކުރެވެއެވެ. ޖޭއެސްސީގެ މައްސަލަ ބެލުމާ މެދު ގޮތެއް ނިންމާ ކޮމިޓީން ވަނީ ފަނޑިޔާރު ނިޔާޒާއި ގާޒީ ފަރުހާދުގެ ފަރާތުން މައްސަލައާ ގުޅޭ މަޢުލޫމާތު ސާފުކޮށްފައެވެ. އަދި މި މައްސަލަތައް ބެލުމާ މެދު ގޮތެއް ނިންމުމަށް ކޮމިޝަންގެ ބައްދަލުވުމަށް ހުށަހެޅުމަށް ތައްޔާރުވަމުންދާކަން އެނގިފައިވެއެވެ.
ފަނޑިޔާރު ނިޔާޒަކީ ހައި ކޯޓުގެ ފަރާތުން ޖޭއެސްސީގައި އިންނަވާ މެންބަރެވެ. އަދި ގާޒީ ފަރުހާދަކީ ސިވިލް ކޯޓުގެ ގާޒީންގެ ތެރެއިން ޖޭއެސްސީއަށް ކަނޑައަޅާފައިވާ ގާޒީއެވެ.
