ރިވެލި ރެސްޓޯރެންޓްގެ މައްސަލަ: އެޗްޑީސީގެ ނިންމުން މަޑުޖައްސާލަން ސިވިލް ކޯޓުން އަންގައިފި

އެޗްޑީސީއަށް ދައްކަންޖެހޭ ކުލި ނުދައްކައި ގިނަ ދުވަސްތަކެއް ވެފައިވާތީ، ހުޅުމާލޭގެ މަޝްހޫރު ރިވެލި ބީޗް ކްލަބް އެންޑް ރެސްޓޯރަންޓް ހިންގާ ބިމުގެ އެއްބަސްވުން ބާތިލްކޮށް، އެ ތަނުގައި އެއްވެސް ވިޔަފާރިއެއް ނުކުރަން އެޗްޑީސީން އެންގި އެންގުން މަޑުޖައްސާލަން ސިވިލް ކޯޓުން އަންގައިފިއެވެ. އެޗްޑީސީން ސޮލާރިސް ހޮސްޕިޓަލިޓީ ޕްރައިވެޓް ލިމިޓެޑާއެކު ހަދާފައިވާ އެއްބަސްވުން ނިމުމަކަށް ގެނެސް، ބިން އެޗްޑީސީގެ ބެލުމުގެ ދަށަށް ގެނެސްފައިވާކަން މިދިޔަ ހަފުތާގައި ސިޓީއަކުން އެންގުމަށްފަހު، މިދިޔަ ހޯމަދުވަހު އެޗްޑީސީން އެތަން ހުސްކުރަން މަސައްކަތްކުރިއެެވެ.

މިކަމާ ދެކޮޅަށް ސޮލާރިސް ކުންފުނިން ސިވިލް ކޯޓަށް މައްސަލަ ހުށަހަޅައި، އެޗްޑީސީގެ ނިންމުން ބާތިލުކޮށްދިނުމަށް އެދުނެވެ. ސިވިލް ކޯޓުން ޣައރު ހާޒިރުގައި ނެރުނު އަމުރުގައި މައްސަލައިގައި ގޮތެއް ކަނޑައެޅުމުގެ ކުރިން ތަން ހުސްކޮށް ވިޔަފާރި ހުއްޓުވައިފިނަމަ ސޮލާރިސްއަށް އިޔާދަނުކުރެވޭނެ ގެއްލުމެއް ލިބޭނެތީ، ރެސްޓޯރެންޓްގެ ހިންގުން ހުއްޓޭނެ އެއްވެސް އަމަލެއް ނުކުރުމަށާއި، އެފަދަ ކަމެއް ކޮށްފައިވާނަމަ އެކަމެއް އިޔާދަކުރުމަށް އަންގާފައެވެ. އެއާއެކު ވަގުތީ ގޮތުން ހިދުމަތް މެދުކަނޑާލި ރިވެލި ރެސްޓޯރެންޓުގެ ހިދުމަތް އަލުން ދޭން ފެށުނެވެ.

އެޗްޑީސީން ނެރުނު ބަޔާނުގައި ބުނީ، އެއްބަސްވުން ބާތިލްކުރީ ކުލި ނުދައްކާ ގިނަ ދުވަސްތަކެއް ވެފައިވާތީ، ދޭންޖެހޭ ހުރިހާ ނޯޓިސްތަކާއި ގިނަ ފުރުސަތުތަކެއް ދިނުމަށްފަހު އެއްބަސްވުމުގެ އިޖުރާއަތުގެ ތެރެއިން ކަމަށެވެ. އެޗްޑީސީގެ އިސް އޮފިޝަލަކު ވިދާޅުވި ގޮތުގައި، ހުޅުމާލޭ ރުއްގަނޑު 1 ސަރަހައްދުގައި ހުންނަ އެ ރެސްޓޯރެންޓުން ކުލީގެ ގޮތުގައި ފަސް މިލިއަނެއްހާ ރުފިޔާ ދައްކަންޖެހެއެވެ. އަދި އެއްބަސްވުން ހެދި ފަހުން ކޮންމެ މަހަކު ގަވާއިދުން ކުލި ނުދައްކާ ކަމަށާއި، އެންގުމުން ވެސް ދެއްކީ ކުލީގެ ބައެއް ކަމަށް ވިދާޅުވިއެވެ.

މީގެއިތުރުން، އެއްބަސްވުމުގައި ބުނާ އިޖުތިމާއީ ޒިންމާގެ ދަށުން ކުރަންޖެހޭ އެއްވެސް ކަމެއްވެސް ރިވެލި ރެސްޓޯރަންޓު ހިންގާ ކުންފުނިން ކޮށްފައިނުވާ ކަމަށް އެޗްޑީސީގެ އޮފިޝަލް ވިދާޅުވިއެވެ. އެޗްޑީސީއަށް އެކި ފަރާތްތަކުން ދައްކަންޖެހޭ ކުލި ބަރާބަރަށް ނުދައްކާ މައްސަލަ ބޮޑުވެ، އެ ޝަކުވާ ކުރާތާ އެތައް ދުވަހެއް ވެއްޖެއެވެ. މީގެ ތެރޭގައި ބައެއް ވިޔަފާރިތަކުގެ އިތުރުން ފްލެޓުތަކުގެ ކުލިވެސް ހިމެނޭކަން ފާހަގަކުރެވެއެވެ.

އެޗްޑީސީން ކުރި ކަންކަމުގެ ތެރޭގައި އެއްބަސްވުން ނިމުމަކަށް ގެނެސް ބިން އަތުލުމަށް ސިޓީ ފޮނުވުމާއި، ތަން ހުސްކުރަން ވަނުމާއި، ގަވާއިދުން ނޯޓިސް ދިނުން ހިމެނެއެވެ. ސޮލާރިސް އިން ކޯޓަށް މައްސަލަ ހުށަހަޅައި، ރެސްޓޯރެންޓުގެ ހިދުމަތް އަލުން ދޭން ފަށައިފައެވެ. ސިވިލް ކޯޓުން އެޗްޑީސީގެ ނިންމުން މަޑުޖައްސާލަން އަމުރުކުރިއެވެ.