ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ސަސްޕެންޑްކޮށްފިއެވެ. މި ނިންމުމާއެކު ރާއްޖޭގެ ބެޑްމިންޓަން ދާއިރާއަށް ބޮޑު ލޮޅުމެއް އަރާފައިވާ ކަމަށް ކަމާބެހޭ ފަރާތްތަކުން ފާހަގަކުރެއެވެ.

ކުޅިވަރާބެހޭ ވުޒާރާއިން މީގެކުރިން ވަނީ އެ އެސޯސިއޭޝަނަށް ދީފައިވާ ޤައުމީ ހައިސިއްޔަތު ވެސް ނަގާފައެވެ. އެކަމާއި ގުޅިގެން ހުސްވި މަހުގެ 30 ވަނަ ދުވަހު އެ އެސޯސިއޭޝަނުން ބުނީ ހިންގާ ޤަވާޢިދަށް ކޮންމެހެން ގެންނަންޖެހޭ ބަދަލުތައް ގެނެސް އެ އެސޯސިއޭޝަންގެ ހިންގާ ކޮމިޓީ އިންތިޚާބު ކުރެވެންދެން އެ އެސޯސިއޭޝަނަށް ދީފައިވާ ޤައުމީ ޙައިސިއްޔަތު ވަގުތީ ގޮތުން މިނިސްޓްރީން އުވައިލީ ކަމަށެވެ.

ބީޑަބްލިއުއެފް އިން ދިވެހި ބެޑްމިންޓަން އެސޯސިއޭޝަން ސަސްޕެންޑް ކުރަން ނިންމީ ބީއޭއެމްގެ ތެރޭގައި ހުރި މައްސަލަތައް ހައްލުކުރުމަށް މޯލްޑިވްސް އޮލިމްޕިކް ކޮމިޓީ (އެމްއޯސީ)އާ ގުޅިގެން އުފެއްދި ކޮމިޓީގެ މަސައްކަތަށް، ކޮމިޝަނަރ އޮފް ސްޕޯޓްސްއާއި ގުޅިގެން އެމްއޯސީ އިން ނުފޫޒު ފޯރުވަމުންދާ ކަމަށް ބުނެއެވެ.

ބެޑްމިންޓަން އެސޯސިއޭޝަންގެ މައްސަލަތައް އުފެދުނީ އެ އެސޯސިއޭޝަންގެ ހިންގާ ކޮމިޓީގެ ދައުރު މިދިޔަ އަހަރުގެ މާޗު މަހުގެ 11 ވަނަ ދުވަހު ހަމަވެގެން ގޮސް، އާ ހިންގާ ކޮމިޓީއެއް އެކުލަވާނުލެވި ގިނަ ދުވަސްތަކެއް ވުމާއި، އަސާސީ ގަވާއިދަށް ގެންނަންޖެހޭ އިސްލާހުތައް ނުގެނެވި އޮތުމުންނެވެ.

މި މައްސަލަ ހައްލުކުރުމަށް ބީޑަބްލިއުއެފް އިން އަންގާފައިވަނީ ތިން މެންބަރުންގެ ޖޮއިންޓް ކޮމިޓީއެއް އެކުލަވާލުމަށެވެ. ނަމަވެސް އެމްއޯސީ އިން ވަނީ އިތުރު ދެ މެންބަރުން އެ ކޮމިޓީއަށް އައްޔަންކޮށްފައެވެ. އަދި ކޮމިޓީގެ ނިންމުންތައް ނިންމަންވާނީ ވޯޓުން ކަމަށް އެމްއޯސީ އިން އަންގާފައިވާ ކަމަށް ބެލެވެއެވެ. ނަމަވެސް، ބީޑަބްލިއުއެފްއިން އެދުނީ ކޮމިޓީގެ ނިންމުންތައް ވޯޓުން ނިންމުމުގެ ބަދަލުގައި މަޝްވަރާގެތެރެއިން ނިންމާށެވެ.

މިކަމާއި ގުޅިގެން ސަރުކާރުގެ ކަމާބެހޭ އިދާރާތަކުން މައްސަލަ ހައްލުކުރުމަށް މަސައްކަތްކުރަމުންދާ ކަމަށް މަޢުލޫމާތު ލިބެއެވެ. އަދި ސަރުކާރުން މައްސަލައަށް ޚާއްޞަ ސަމާލުކަމެއް ދެއްވައި، އަވަސް ހައްލެއް ހޯދުމަށް އަންގަވާފައިވާ ކަމަށްވެސް މަޢުލޫމާތު ލިބެއެވެ.