ފަލަސްޠީނުގެ ޣައްޒާގެ ރައްޔިތުންނަށް އިސްރާއީލުން ދެމުންދާ ޢުދުވާނީ ޙަމަލާތައް ހުއްޓުވުމަށް އަވަސް ފިޔަވަޅުތަކެއް އެޅުމަށް ބައިނަލްއަޤްވާމީ މުޖުތަމަޢުއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވަނީ އިސްރާއީލުން ޣައްޒާއަށް ދެމުންދާ ހަމަލާތައް ހަރުކަށި އިބާރާތުން ކުށްވްވެރިކުރައްވައިފިއެވެ. އަދި މި ހަމަލާތައް ވަގުތުން ހުއްޓުވުމަށާއި، ބައިނަލްއަޤްވާމީ ޤާނޫނުތަކާއި އެއްގޮތަށް ޣައްޒާގެ ރައްޔިތުންގެ ފުރާނަ ހިމާޔަތްކުރުމަށް ގޮވާލައްވާފައިވެއެވެ.

"ޣައްޒާގެ ކުށެއްނެތް އެތައް ބަޔަކަށް އަމާޒުކޮށްގެން ދެމުންދާ ހަމަލާތައް އަޅުގަނޑު ހަރުކަށި އިބާރާތުން ކުށްވެރިކުރަން. މި ލާއިންސާނީ ޢަމަލުތައް ވަގުތުން ހުއްޓުވުމަށް ބައިނަލްއަޤްވާމީ މުޖުތަމަޢުއިން އަވަސް ފިޔަވަޅުތަކެއް އަޅަންޖެހޭ," ރައީސް މުޢިއްޒު ވިދާޅުވިއެވެ.

މީގެ ކުރިން، އ.ދ.ގެ 79 ވަނަ އާންމު މަޖިލީހުގެ ޖަލްސާގައި ރައީސް މުޢިއްޒު ދެއްކެވި ވާހަކަފުޅުގައިވެސް، ޣައްޒާގައި ހިނގަމުންދާ ޤަތުލުޢާންމު ހުއްޓުވުމަށާއި ފަލަސްޠީނުގެ މިނިވަން ދައުލަތެއް ޤާއިމުކުރުމަށް ގޮވާލައްވާފައިވެއެވެ. އަދި ފަލަސްޠީނުގެ މިނިވަން ދައުލަތަކަށް ރާއްޖޭގެ ފުރިހަމަ ތާއީދު އޮންނާނެކަން ސަރުކާރުން ހާމަކުރައްވާފައިވެއެވެ.

މިދިޔަ ބުރާސްފަތި ދުވަހުން ފެށިގެން އިސްރާއީލުން ވަނީ ޣައްޒާއަށް ދޭ ހަމަލާތައް އިތުރަށް ހަރުކަށިކޮށްފައެވެ. މިހާތަނަށް އެތައް ސަތޭކަ ރައްޔިތުންނެއް ޝަހީދުވެފައިވާ ކަމަށް ރިޕޯޓުތަކުން ދައްކައެވެ. ފަލަސްޠީނުގެ ޞިއްޙަތާބެހޭ ވުޒާރާއިން ބުނާ ގޮތުގައި 2023 އޮކްޓޯބަރު 7 އިން ފެށިގެން މިހާތަނަށް 53,272 މީހުން ޝަހީދުވެފައިވެއެވެ. އަދި 120,673 މީހުން ޒަޚަމްވެފައިވާ ކަމަށް އެ ވުޒާރާއިން ބުނެއެވެ.