ޣައްޒާގައި ހަމާސް ބަލިކޮށް، ދެން ތިބި ރަހީނުން މިނިވަންކުރުމަށް ކަމަށް ބުނެ ބޮޑު އޮޕަރޭޝަނެއް ފަށައިފިކަމަށް އިސްރާއީލުގެ ސިފައިން މީގެ އިރުކޮޅެއް ކުރިން އިއުލާނުކޮށްފިއެވެ.
އިސްރާއީލު ޑިފެންސް ފޯސަސް (އައިޑީއެފް)އިން އެ ޤައުމުގެ ބަހުން އެކްސްގައި ބުނެފައިވަނީ "އޮޕަރޭޝަން ގިޑިއަންސް ޗެރިއަޓްސް" ގެ ނަމުގައި ޣައްޒާގެ "މުހިންމު ސަރަޙައްދުތަކެއް" އަތުލުމަށް ސިފައިން ތައްޔާރުކޮށްފައިވާ ކަމަށެވެ.
ހަމާސްއިން ހިންގާ ސިވިލް ޑިފެންސް އަދި ހެލްތު މިނިސްޓްރީގެ އޮފިޝަލުން ބުނާ ގޮތުގައި ބުރާސްފަތި ދުވަހުން ފެށިގެން އިސްރާއީލުގެ ހަމަލާތަކުގައި 250 އެއްހާ މީހުން ޝަހީދުކޮށްލައިފި އެވެ.
Advertisement
މާރިޗު މަހު ދެ މަސް ދުވަހުގެ ހަނގުރާމަ ހުއްޓުމަކަށް އައުމަށްފަހު އިސްރާއީލުން ވަނީ ޣައްޒާއަށް އެހީ ފޯރުކޮށްދިނުން ހުއްޓާލާފައެވެ. އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވެފައިވަނީ "ޣައްޒާގައި ގިނަ ބަޔަކު ބަނޑަށް ޖެހިފައި" ތިބި ކަމަށެވެ.
އިސްރާއީލުގެ ސިފައިންގެ އިނގިރޭސި ބަހުގެ އެކްސް އެކައުންޓުގައި މި އޮޕަރޭޝަންގެ ނަން ބޭނުންކޮށްފައެއް ނުވެއެވެ. އެހެންނަމަވެސް އެ އެކައުންޓުގައި ބުނެފައިވަނީ ހުރިހާ ރަހީނުން ސަލާމަތް ކުރާނެ ކަމަށާއި ހަމާސް ބަލިކުރާނެ ކަމަށެވެ. އަދި ރަހީނުން މިނިވަން ވަންދެން މިހާރު ފަށާ އޮޕަރޭޝަން ހުއްޓާނުލާނެ ކަމަށެވެ.
ހަނގުރާމަ ހުއްޓާލުމަށާއި ޣައްޒާ އަށް ވަދެ ނުކުމެވޭ މަގުތައް ހުޅުވުމަށް ބައިނަލްއަޤްވާމީ ފަރާތްތަކުން ގޮވާލަމުންދާއިރުވެސް، އިސްރާއީލުން ވަނީ ފަރުވާލެއް ނުބަހައްޓައެވެ.
ޚަބަރުތައް ބުނާގޮތުން އިސްރާއީލުން މިހާރު ވަނީ ބޯޑަރު ސަރަޙައްދުގައި އިތުރު ހަތިޔާރު އެއްކުރަން ފަށާފަވެ.
ބައެއް މަސްދަރުތަކުން ބުނެފައިވާ ގޮތުގައި "ގިޑިއަންސް ޗެރިއަޓްސް" ނުވަތަ ޒައެނިސްޓުން ބުނާ ގޮތުންނަމަ ބައިބަލުގައި ބަޔާންކުރާ ހަނގުރާމަވެރިއެއްގެ ނަމަށް ނިސްބަތްކޮށް ކިޔާފައިވާ މި އޮޕަރޭޝަނުގައި - އައިޑީއެފްއިން ޣައްޒާގެ ސަރަޙައްދުތަކެއް އަތުލައި، އާންމުން ދެކުނަށް ބަދަލުކޮށް، ހަމާސްއަށް ހަމަލާދީ، އެހީ ފޯރުކޮށްދިނުމުގެ ކަންކަން ހަމާސްގެ ބާރުގެ ދަށުން ނެގުމަށް މަސައްކަތްކުރާނެއެވެ.
