ސަމާހަތްތެރިކަމާއި އެކު މުޖުތަމަޢުގައި އެންމެންވެސް ޝާމިލުކުރުމުގެ ސަގާފަތެއް ގެންގުޅެންޖެހޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ބައިނަލްއަޤުވާމީ ގުޅިގެން ސުލްޙައާއި އަމާންކަމާއެކު ދިރިއުޅުމުގެ ދުވަހާ ގުޅިގެން މީސްމީޑިޔާގައި ޙިއްސާކުރެއްވި ޕޯސްޓެއްގައި ރައީސުލްޖުުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ގުޅިގެން އަމާންކަމާއެކު ދިރިއުޅުމުގެ ދުވަހެއް ފާހަގަކުރާއިރު، ދިވެހި މުޖުތަމަޢުގައި އުޅޭ ތަފާތު މިޒާޖުގެ މީހުންނަކީ ޤައުމުގެ ކުރިއެރުމަށް ލިބޭ ބާރެއްކަމަށް ދެކެންޖެހޭ ކަމަށެވެ.

ރައީސް ވިދާޅުވީ ދނީ ދިވެހި މުޖުތަމަޢުގައި އުޅޭ ތަފާތު މިޒާޖުގެ މީހުންނަކަކީ ޤައުމުގެ ކުރިއެރުމަށް ލިބޭ ބާރެއްގެ ގޮތުގައި ދެކެންޖެހޭ ކަމަށެވެ. އަދި އެންމެން ގުޅިގެން އަމާންކަމާއެކު ކުރިއެރުމުގެ މަގު ފަހިކުރަންޖެހޭ ކަމަށްވެސް ވިދާޅުވިއެވެ.

ސަރުކާރުން މިހާރުވެސް ދަނީ އެންމެން ޝާމިލުވާ މުޖުތަމަޢެއް ޤާއިމުކުރުމަށް މަސައްކަތްތަކެއް ކުރައްވަމުންނެވެ. މީގެ ތެރޭގައި ނުކުޅެދުންތެރިކަން ހުންނަ ފަރާތްތަކަށް ޚާއްޞަ ސަމާލުކަމެއް ދެއްވައި، އެފަދަ ފަރާތްތަކަކީވެސް ޤައުމުގެ ކުރިއެރުމުގައި ދައުރެއް އަދާކުރެވިދާނެ ބަޔަކަށް ހެދުމަށް ތަފާތު ޕްރޮގްރާމްތައް ހިންގަވަމުން ގެންދަވައެވެ.

މީގެ އިތުރުން، ދިވެހި މުޖުތަމަޢަކީ އަމާން އަދި ސުލްޙަވެރި ތަނަކަށް ހެދުމަށްޓަކައި، އިޖުތިމާޢީ ބަލިތައް ނައްތާލުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރައްވަމުންނެވެ.

ބައިނަލްއަޤުވާމީ ގުޅިގެން ސުލްޙައާއި އަމާންކަމާއެކު ދިރިއުޅުމުގެ ދުވަހުގެ މަޤްޞަދަކީ އެކި މިޒާޖުތަކުގެ މީހުން އުޅޭކަން ޤަބޫލުކޮށް، އެހެން މީހުންނަށް އިޙްތިރާމްކޮށް، ބަލައިގަނެ، އެމީހުންގެ ވާހަކަތައް އަޑުއަހައި އެއްބައިވަންތަކަމާއެކު ދިރިއުޅުމެވެ.