މާލޭގެ ގެއެއްގެ ފުރާޅު މައްޗަށް އަންހެނަކު ވެއްޓުނު މައްސަލާގައި އޭނާއާ ގުޅޭ ގޮތުން އުފުލާފައިވާ ތުހުމަތުތަކުގައި އެއްވެސް އަސާސެއް ނެތް ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
މަޖިލީހުގައި ތިއްބަވާ އެމްޑީޕީގެ 12 މެންބަރުން ސޮއިކޮށް މަޖިލީހަށް ހުށަހަޅުއްވާފައިވާ އަމީންގެ އިތުބާރު ނެތްކަމުގެ މައްސަލައަށް ޖަވާބުދާރީވެވަޑައިގަތުމަށް އޭނާ މިއަދުގެ މަޖިލިސް ޖަލްސާއަށް ވަޑައިގަތެވެ.
އެ ޖަލްސާގައި އަމީން ވަނީ އޭނާގެ އިތުބާރު ނެތްކަމުގެ މައްސަލާގައި ކޮށްފައިވާ ހަތް ތުހުމަތަށް ވަކިވަކިން ޖަވާބުދާރިވެވަޑައިގެންފަ އެވެ. އަދި އެ ހަތް ތުހުމަތު ވެސް ދޮގުކުރައްވައި، އެ ތުހުމަތުތަކުގައި އެއްވެސް އަސާސެއް ނެތް ކަމަށް އޭނާ ވިދާޅުވި އެވެ.
Advertisement
އަމީން ވިދާޅުވީ އަންހެން މީހާ ވެއްޓުނު ހާދިސާގައި ތުހުމަތުކުރެވޭ މީހުންގެ ތެރޭގައި އޭނާއާ އާއިލީ ގޮތުން ގުޅުން އޮންނަ މީހެއް ޝާމިލުވާކަން ތަހުގީގީ އެއްވެސް އިދާރާއަކުން ހާމަކޮށްފައި ނުވާ ކަމަށެވެ. އަދި އާއިލީ މީހަކު ޝާމިލުވާ ކަމަށް އެހެން ގޮތަކުން ވެސް މައުލޫމާތު ލިބިފައިނުވާ ކަމަށް އޭނާ ވިދާޅުވި އެވެ.
އެހެންކަމުން ބުއްދީގެ ހަމަތަކުން ބަލާއިރު، މި މައްސަލައަށް ނުފޫޒުފޯރުވަންވީ އެއްވެސް ސަބަބެއް ނެތް ކަމަށާއި ވަކި ގޮތަކަށް އަމަލުކުރުމަށް އެއްވެސް ތަހުގީގީ އިދާރާއަކަށް ނުފޫޒު ފޯރުވާފައިނުވާނެ ކަމަށް ވެސް އަމީން ވިދާޅުވި އެވެ.
އަމީން ވިދާޅުވީ އޭނާ ދިރިއުޅުއްވާ ގޭގައި މި މައްސަލާގައި ތުހުމަތުކުރެވޭ ބަޔަކު ޣައިރު ގާނޫނީ އަމަލުތަކެއް ކޮށްފައިވާކަން މައްސަލާގައި ފާހަގަކުރެވިފައިވާ ކަމަށެވެ. ނަމަވެސް އެ ގެއަކީ ހަމައެކަނި އޭނާގެ ގެއެއް ނޫން ކަމަށާއި އޭނާގެ އެއްބަނޑުއެއްބަފާ ތިން މީހެއް އެ ގެއަށް ނިސްބަތްވާ ކަމަށް އަމީން ވިދާޅުވި އެވެ.
އަމީން ވިދާޅުވީ ގޭގެ ވެރިންގެ ތެރޭގައި ގިނަ ބަޔަކު ހިމެނޭއިރު، ވަކި މަގާމެއްގައި ހުރީތީ، ބަލަދު ނަރާ ބަޔަކު ކުރާ ޣައިރު ގާނޫނީ އަމަލެއްގެ ޒިންމާ އޭނާ ނެގުމަކީ އެއްވެސް އަސާސެއް ހުރިކަމެއް ނޫން ކަމަށެވެ.
