ދިރޭތަކެއްޗާ ބެހޭ މިނިސްޓްރީން "އޮޅުހިޔާ"އާ ހަވާލުވި އިރު, އެތަން ހުރީ ބުޅާ ގެންގޮސް ބެލެހެއްޓޭނެ ކަހަލަ ހާލަތެއްގައި ނޫން ކަމަށާއި އެތަނުގެ ވަސީލަތްތައް ފުރިހަމަކުރުމަށް ފަހު މާލޭގައި އުޅޭ ހުރިހާ ބުޅާތައް އެތަނަށް ގެންދާނެ ކަމަށް މިނިސްޓަރު ޑރ. މަރިޔަމް މާރިޔާ މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދު ޖަލްސާގައި މާރިޔާ ވިދާޅުވީ އޮޅުހިޔާގައި ވަސީލަތްތައް ފުރިހަމަ ނުވިޔަސް، މިނިސްޓްރީގެ މުވައްޒަފުންގެ މަސައްކަތުން އެތަނާއި ހަވާލުވިތާ 16 ގަޑިއިރުގެ ތެރޭގައި 15 ބުޅާ އެ ފެސިލިޓީއަށް ގެންދިޔަ ކަމަށެވެ. އަދި މިހާރު މަސައްކަތްކުރަމުން އަންނަނީ އެތަނުގައި ފުރިހަމަ ކުރަން ޖެހޭ ކަންތައްތައް ފުރިހަމަކުރުމުގެ މަސައްކަތް ކަމަށް އޭނާ ވިދާޅުވި އެވެ.
މާރިޔާ ވިދާޅުވީ މި މައްސަލަ ހައްލުކުރަން މަޖިލީހުގެ އެހީތެރިކަން ވަރަށް ބޮޑަށް ބޭނުންވާ ކަމަށެވެ. އެއީ ބްރީޑްކުރުމަށް ނުވަތަ އާލާކުރުމަށް ބުޅާ އެތެރެކުރުމަށް ހުއްދަ ދިނުން ހުއްޓާލުމާއި ޕެޓުގެ ގޮތުގައި އެތެރެކުރާ ބުޅާ ނިއުޓާކުރުމަށް ލާޒިމްކުރުމަށް ކަމަށާއި އެކަން ކުރެވޭނީ މިހާރު މަޖިލީހަށް ފޮނުވާފައިވާ ޖަނަވާރު ގެންގުޅުމާއި ޖަނަވާރުގެ ދުޅަހެޔޮކަމާ ބެހޭ ބިލު ފާސްކޮށް އަމަލުކުރަން ފެށުމުން ކަމަށް އޭނާ ވިދާޅުވި އެވެ.
އޮޅުހިޔާގައި ބުޅާ ބެލެހެއްޓުމަށް ހިނގާ ހަރަދުތަކުގެ ތަފްސީލް ހިއްސާކުރައްވަމުން މާރިޔާ ވިދާޅުވީ ކޮންމެ ބުޅަކަށް އަހަރަކު 5,416ރ. ހަރަދުވާނެ ކަމަށެވެ.
މާރިޔާ ވިދާޅުވީ އެ ފެސިލިޓީއަށް ނޮން ރިކަރަންޓު ހަރަދުގެ ގޮތުގައި 1.2 މިލިއަން ރުފިޔާ ހަރަދުވާނެ ކަމަށާއި ފެސިލިޓީގައި 2,000 ބުޅަލަށް މަހަކު 7 ލައްކަ ރުފިޔާ ހަރަދުވާނެ ކަމަށެވެ. އަދި ކޮންމެ ތިން މަހަކުން 3.4 މިލިޔަން ހަރަދުވާނެ ކަމަށާއި އަހަރަކު 10.8 މިލިޔަން ރުފިޔާ ހަރަދުވާނެ ކަމަށް މާރިޔާ ވިދާޅުވި އެވެ.
އޮޅުހިޔާ ނުވަތަ ބުޅާތައް ބަލަހައްޓަން ހާއްސަ ފެސިލިޓީ ހުޅުވާފައި ވަނީ ހުޅުމާލެ ދެވަނަ ފިޔަވަހިން 5,000 އަކަފޫޓުގެ ބިމެއްގަ އެވެ. މާލެ ސަރަހައްދުގެ މަގުތަކުގައި ބުޅާ ގިނަވާ މައްސަލަ ހައްލުކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ. މި ފެސިލިޓީ ހެދީ ވެސް އެ ވައުދު ފުއްދުމަށެވެ.
