ސަރުކާރުގެ ޚަރަދުގައި ބޭރު ގައުމުތަކުގައި ކިޔަވަމުންދާ ދަރިވަރުންނަށް ޚާއްޞަ މޮބައިލް އެޕްލިކޭޝަނެއް އަންނަ އޮކްޓޯބަރު މަހުގެ ކުރިން ތަޢާރަފުކުރާނެ ކަމަށް، ރައްޔިތުންގެ މަޖިލީހުގައި މިއަދު ހަޔަރ އެޑިޔުކޭޝަން މިނިސްޓަރު ޑރ. އަލީ ހައިދަރު އަޙްމަދު ވިދާޅުވެއްޖެއެވެ.

"ހަޔަރ އެޑިޔުކޭޝަން މެނޭޖްމަންޓް ސިސްޓަމް" ގެ ނަމުގައި ތަޢާރަފުކުރާ މި އެޕް މެދުވެރިކޮށް ދަރިވަރުންނަށް ދިމާވާ ދަތިތަކާއި ޝަކުވާތައް އަވަހަށް ބަލައިގަނެ، އެކަންކަމަށް ހައްލު ހޯދައިދެވޭނެ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، އެޕް ތަޢާރަފުކުރުމުގެ ކުރިން ވެސް ދަރިވަރުންގެ ޝަކުވާތައް ބަލައިގަތުމަށް ޚާއްޞަ ވަޓްސްއެޕް ނަންބަރެއް ތަޢާރަފުކޮށް، އެ ނަންބަރަށް ހުށަހަޅާ ޝަކުވާތަކަށް ވަގުތުން ޖަވާބުދެމުންދާ ކަމަށެވެ.

ސްޓޫޑެންޓް ލޯނު ސްކީމްގެ ދަށުން ފައިސާ ލިބުމުގައި ދިމާވާ ދަތިތަކާ ގުޅޭގޮތުން މިނިސްޓަރު ވިދާޅުވީ، އެފަދަ މައްސަލަތައް ހައްލުކުރުމަށް މަސައްކަތްކުރަމުންދާ ކަމަށެވެ. އެގޮތުން ސްޕެއިންގައި ޕައިލެޓްކަން ކިޔަވާ ދަރިވަރުންނާ މިދިޔަ ހަފުތާގައި އޮންލައިންކޮށް ބައްދަލުކޮށް، އެ ކުދިންގެ ކަންބޮޑުވުންތަކަށް ހައްލު ހޯދުމުގެ މަސައްކަތް ފަށާފައިވާ ކަމަށް މިނިސްޓަރު ވިދާޅުވިއެވެ.