ރާއްޖެއާއި ރާއްޖެއިން ބޭރުން މަތީ ތައުލީމާއި ތަމްރީނު ހޯދުމަށް އެދި ހުށަހެޅުމުގެ ފުރުސަތު، ގިނަ ހެޔޮ ބަދަލުތަކަކާއެކު ސަރުކާރުން މިއަދު ހުޅުވާލައިފި އެވެ. މި ފުރުސަތު ހުޅުވާލުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހަޔަ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވީ، ގައުމަށް ބޭނުންވާ ޓެކްނިކަލް ދާއިރާތަކުން ކިޔަވަން ޝައުގުވެރިވާ ކުދިންނަށް އެއްވެސް ލިމިޓެއް ނެތި ފުރުސަތު ދިނުމަށް ސަރުކާރުން ނިންމާފައިވާ ކަމަށެވެ.
މި ލޯން ސްކީމަށް ގެނެވުނު އެންމެ ބޮޑު އެއް ބަދަލަކީ، ކޮންމެ އަހަރަކު ދޫކުރާ ލޯނުގެ މަދުވެގެން %50 އަކީ ޓެކްނިކަލް ދާއިރާތަކަށް ހާއްސަ ކުރެވޭ ލޯނަށް ހެދުމެވެ. މިނިސްޓަރު ވިދާޅުވި ގޮތުގައި ޓެކްނިކަލް ނޫން ދާއިރާތަކަށް ދެވޭ ލޯނުގެ އަދަދު ވަކި މިންވަރެއްގައި ހިފެހެއްޓި ނަމަވެސް، ފަންނީ ދާއިރާތަކުން ކިޔަވަން ބޭނުންވާ ދަރިވަރުންނަށް އެއްވެސް ހިފެހެއްޓުމެއް ނެތި ފުރުސަތު އޮންނާނެ އެވެ. "މި ބަދަލުގެ ބޭނުމަކީ ކޮންމެ ދަރިވަރަކީވެސް ރާއްޖެ ބިނާކުރުމުގައި ބައިވެރިވާނެ ތައުލީމީ، ގާބިލު ފަންނުވެރި އުފެއްދުންތެރިއަކަށް ހެދުން،" މިނިސްޓަރު ވިދާޅުވި އެވެ.
މިފަހަރުގެ ލޯން ސްކީމްގެ ދަށުން އެޕްލިކޭޝަން ހުށަހެޅުމަށް ވަކި ސުންގަޑިއެއް ނޯންނާނެ އެވެ. މިއީ ކިޔަވަންދާން ތައްޔާރުވާ ދަރިވަރުންނަށް ލިބޭނެ ވަރަށް ބޮޑު ލުޔެކެވެ. ދަރިވަރުންނަށް ޕްލޭސްމަންޓް ލިބުމާއެކު، އެމްކިޔުއޭގެ އިންޓެންޑެޑް ލެޓާ އާއި ފީ ސްޓްރަކްޗާ ހުށަހެޅުމުން ލޯނަށް އެދެވޭނެ އެވެ. އަދި ކުރިން އޮތް "އަލަށް ކިޔަވާ ދަރިވަރުން" އަދި "ކިޔަވަމުންދާ ދަރިވަރުން" މި ދެ ކެޓަގަރީވެސް ވަނީ އުވާލާފަ އެވެ.
މި ލޯނަކީ ޝަރީއާ ކޮމްޕްލަޔަންޓް ލޯނަކަށް ވާއިރު، ކިޔެވުމަށް ހަރަދުކުރި މިންވަރަށްވުރެ އިތުރަށް އިންޓްރެސްޓްގެ ގޮތުގައި އެއްވެސް ފައިސާއެއް ނުނަގާނެ އެވެ. ސަރުކާރުން މިހާރު ވަނީ ލޯނު ދިނުމުގެ އުސޫލު ގެޒެޓްކޮށްފަ އެވެ. އެ އުސޫލުގައިވާ ގޮތުން ލޯނުގެ ގޮތުގައި އެންމެ ގިނައިން ދޫކުރެވޭނީ 2.5 މިލިއަން ރުފިޔާ އެވެ. ނަމަވެސް ޓޮޕްއަޕް ލޯނާއެކު މި އަދަދު 3.2 މިލިއަން ރުފިޔާއަށް އިތުރުކުރެވޭނެ އެވެ.
