މިނިސްޓްރީ އޮފް އެޑިއުކޭޝަން އަދި މިނިސްޓްރީ އޮފް ހަޔަ އެޑިއުކޭޝަން އެއްކޮށްލުމަށްފަހު، އެ މިނިސްޓްރީގެ މިނިސްޓަރުގެ މަގާމަށް ޑރ. އިސްމާއިލް ޝަފީއު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އައްޔަންކުރައްވައިފި އެވެ.
މި ބަދަލާއެކު، އަލަށް އުފެއްދެވި މިނިސްޓްރީގެ ނަމަކީ މިނިސްޓްރީ އޮފް އެޑިޔުކޭޝަން، ހަޔަ އެޑިޔުކޭޝަން އެންޑް ސްކިލްސް ޑިވެލޮޕްމަންޓް އެވެ. އިސްމާއިލް ޝަފީއު މީގެ ކުރިން ހުންނެވީ އެޑިއުކޭޝަން މިނިސްޓަރުގެ މަގާމުގަ އެވެ.
ސަރުކާރުގެ ކެބިނެޓަށް މި ބޮޑު ބަދަލު އައީ މިއަދުގެ ވަގުތެއްގައި 10 މިނިސްޓަރަކު ކުއްލި ގޮތަކަށް މަގާމުން އިސްތިއުފާ ދެއްވުމާ ގުޅިގެންނެވެ. އިސްތިއުފާ ދެއްވި ބޭފުޅުންގެ ތެރޭގައި ހަޔަ އެޑިއުކޭޝަން މިނިސްޓަރުގެ މަގާމުގައި ހުންނެވި ޑރ. އަލީ ހައިދަރު ވެސް ހިމެނެ އެވެ. އަލީ ހައިދަރަކީ މި ސަރުކާރު ފެށުނުއިރު ހައުސިން މިނިސްޓަރުގެ މަގާމުގައި ހުންނެވި ބޭފުޅެކެވެ. ނަމަވެސް، 2024 ވަނަ އަހަރުގެ ޑިސެމްބަރު މަހުގެ ތެރޭގައި އޭނާ ވަނީ ހަޔަ އެޑިއުކޭޝަން މިނިސްޓަރުގެ މަގާމަށް ބަދަލުކުރައްވާފަ އެވެ.
ރައީސުލްޖުމްހޫރިއްޔާގެ އޮފީހުން މައުލޫމާތު ދެއްވި ގޮތުގައި، މިނިސްޓަރުން މިއަދު އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށްޓަކައި ރައީސް ޑރ. މުހައްމަދު މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް މަގުފަހިކޮށްދެއްވުމުގެ ގޮތުންނެވެ.
މި އިސްލާހީ ބަދަލުތަކާއެކު، ސަރުކާރުގެ ވުޒާރާތަކުގެ ހިންގުން ހަރުދަނާކުރުމުގެ ގޮތުން ކުރިން އޮތް 20 މިނިސްޓްރީގެ މެންޑޭޓަށް ބަދަލު ގެނެސް، ވުޒާރާތަކުގެ ޖުމްލަ އަދަދު ވަނީ 15 އަށް މަދުކޮށްފަ އެވެ. މި ބަދަލުތަކާއެކު ކެބިނެޓް މިރޭ ވަނީ އަލުން އެކުލަވާލައި، މިނިސްޓަރުންނަށް މަގާމުގެ ފަތްކޮޅު އަރުވާފަ އެވެ.
