މަތީ ސާނަވީ އިމްތިހާނުތަކުން މުގައްރަރުކުރާ ނަތީޖާ ހޯދައިގެން "ހައި އެޗީވާސް ސްކޮލަޝިޕް" ލިބޭ ދަރިވަރުންގެ ތެރެއިން ރާއްޖޭގައި ތިބެގެން ކިޔަވާ ދަރިވަރުންނަށް، ސްޓައިޕެންޑުގެ އިތުރުން މަހަކު 6000 ރުފިޔާގެ އެލަވަންސެއް ދިނުމަށް ސަރުކާރުން ނިންމަވައިފި އެވެ.
ހަޔަ އެޑިއުކޭޝަން މިނިސްޓްރީން މިހާރު ވަނީ ހައި އެޗީވާސް ސްކޮލަޝިޕާއި، ރައީސުލްޖުމްހޫރިއްޔާ ދެއްވާ ހާއްސަ ސްކޮލަޝިޕް ދިނުމުގެ އުސޫލަށް ބަދަލުތަކެއް ގެނެސް އާންމުކުރައްވާފަ އެވެ. މި ބަދަލުތަކާ ގުޅޭގޮތުން އެ މިނިސްޓްރީގެ ސްޓޭޓް މިނިސްޓަރު އަބްދުއްރަހީމް ވިދާޅުވީ، ރާއްޖޭގައި ކިޔަވާ ދަރިވަރުންނަށް އިތުރު އެލަވަންސެއް ދޭން ނިންމީ ރަނގަޅު ނަތީޖާ ހޯދާ މޮޅު ދަރިވަރުން ރާއްޖޭގައި ތިބެގެން ކިޔެވުމަށް ބާރުއެޅުމުގެ ގޮތުން ކަމަށެވެ.
އައު އުސޫލުގައިވާ ގޮތުން ހައި އެޗީވަރސް ސްކޮލަރޝިޕް ދެން ލިބޭނީ އޭލެވެލް ނުވަތަ އެއާ އެއްފެންވަރުގެ އިމްތިހާނަކުން، ދިވެހި އަދި އިސްލާމް ހިމެނޭހެން 5 މާއްދާއިން "އޭ" ގްރޭޑް ހޯދައި، އޭގެ ތެރެއިން މަދުވެގެން އެއް މާއްދާއިން "އޭ ސްޓާ" ހޯދާ ދަރިވަރުންނަށެވެ. މީގެ އިތުރުން، އޯލެވެލް އިނގިރޭސި މާއްދާއިން މަދުވެގެން "ސީ" ފާހެއް އޮންނަންޖެހެ އެވެ. ކުރިން މި ސްކޮލަޝިޕް ދެމުން އައީ 5 މާއްދާއިން "އޭ" ގްރޭޑް ލިބޭ ދަރިވަރުންނަށެވެ.
Advertisement
ރައީސުލްޖުމްހޫރިއްޔާގެ ހާއްސަ ސްކޮލަޝިޕާ ގުޅޭގޮތުން އުސޫލަށް ގެނައި ބަދަލުގައިވަނީ، އެ ސްކޮލަޝިޕްގެ ދަށުން ކިޔަވަން ފުރުސަތު ދޭނީ ރާއްޖޭގެ 'ޓްރެއިނިން ނީޑްސް ރިކުއަޔަމަންޓް ލިސްޓު' ގައި ހިމެނޭ ދާއިރާތަކުން ކަމަށެވެ. ނަމަވެސް، ނިމިދިޔަ އަހަރު އޭލެވެލް ނިންމައި ރައީސްގެ ސްކޮލަޝިޕް ކާމިޔާބުކުރި ދަރިވަރުންނަށް، އެކުދިން ބޭނުންވާ ކޮންމެ ދާއިރާއަކުން ކިޔެވުމުގެ ފުރުސަތެއް ދިނުމަށް ވަނީ ނިންމާފަ އެވެ.
މި ސްކޮލަޝިޕްތަކުގެ ދަށުން ކިޔަވާ ދަރިވަރުން ކިޔެވުން ނިންމުމަށްފަހު، 4 އަހަރާއި 7 އަހަރާ ދެމެދުގެ މުއްދަތަކަށް ސަރުކާރަށް ހިދުމަތް ކުރަންޖެހެ އެވެ. އަދި އެއްބަސްވުމާ އެއްގޮތަށް ހިދުމަތް ނުކުރާ ފަރާތްތަކުން، ސަރުކާރުން އެ ދަރިވަރަކަށްޓަކައި ކުރި ހަރަދު އަނބުރާ ދައްކަންޖެހޭނެ ކަމަށްވެސް އައު އުސޫލުގައި ބަޔާންކޮށްފައިވެ އެވެ.
