ސްޓޫޑެންޓް ލޯނަށް އެދި ހުށަހެޅުމަށް ވަކި މުއްދަތެއް ކަނޑައެޅުމުގެ ބަދަލުގައި، މުޅި އަހަރު ދުވަހު އެ ފުރުސަތު ހުޅުވާލުމަށް ސަރުކާރުން ނިންމައިފިއެވެ.
މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހަޔާ އެޑިއުކޭޝަން މިނިސްޓަރު ޑރ އަލީ ހައިދަރު އަހްމަދެވެ.
މިނިސްޓަރު ވިދާޅުވީ، 2026 ވަނަ އަހަރުގެ ލޯނު ސްކީމަށް ބަދަލުތަކެއް ގެނައުމަށް ސަރުކާރުން ނިންމަވާފައިވާ ކަމަށެވެ. މިގޮތުން، ލޯނަށް އެދުމަށް ހާއްސަ ޕޯޓަލްއެއް ތައްޔާރުކުރުމާއި އުސޫލުތައް އިސްލާހުކުރުމުގެ މަސައްކަތް މިހާރު ކުރިއަށްދާކަން މިނިސްޓަރު ފާހަގަކުރެއްވިއެވެ.
Advertisement
މި ބަދަލު ގެނައުމުގެ މައިގަނޑު މަގްސަދަކީ، މީގެ ކުރިން ކަނޑައެޅިފައި އޮންނަ ކުރު މުއްދަތެއްގެ ތެރޭގައި ލިޔެކިޔުންތައް ހަމަކޮށް ލޯނަށް އެދުމުގައި ދަރިވަރުންނަށް ކުރިމަތިވާ ދަތިތަކަށް ހައްލެއް ހޯދައިދިނުންކަން މިނިސްޓަރު ފާހަގަކުރެއްވިއެވެ. އަދި މުޅި އަހަރަށް ފުރުސަތު ހުޅުވާލުމުން، އެކި ސަބަބުތަކާހުރެ ފުރުސަތު ގެއްލިގެންދާ ދަރިވަރުންގެ އަދަދު މަދުވެ، ލޯނަށް އެދުމުގައި ބޮޑު ލުޔެއް ލިބިގެންދާނެކަމަށް ވެސް މިނިސްޓަރު ވިދާޅުވިއެވެ.
މީގެ އިތުރުން، ލޯނަށް އެދޭއިރު ހުށަހަޅަންޖެހޭ ލިޔެކިޔުންތަކަށް ވެސް ބައެއް ބަދަލުތައް އަންނާނެކަމަށް މިނިސްޓަރު ވިދާޅުވިއެވެ.
ކުރިއަށް އޮތް ބަންދު ދުވަސްތަކަށްފަހު ލޯނަށް އެދުމުގެ ފުރުޞަތު ހުޅުވާލާނެކަން އިޢުލާން ކުރައްވަމުން، ދަރިވަރުން ދުރާލާ ލިޔެކިޔުންތައް ތައްޔާރުކުރުމަށް ވަޒީރު އިލްތިމާސްކުރެއްވިއެވެ. އަދި ފުރިހަމަ އެޕްލިކޭޝަނެއް ހުށަހަޅާ ދަރިވަރުންނަށް، ކުރިއަށްވުރެ އަވަހަށް ލޯނުގެ ފައިސާ ހަމަޖެހިގެންދާނެ ކަމުގެ ޔަޤީންކަން ވެސް ދެއްވިއެވެ.
