މަތީ ސާނަވީ އިމްތިހާނުން އެއްވަނަ ދަރަޖައިގައި ފާސްވާ ދަރިވަރުންނަށް ރައީސުލްޖުމްހޫރިއްޔާ ދެއްވާ ހާއްސަ ސްކޮލާޝިޕް ލިބޭ ދަރިވަރުން، އެ ދަރިވަރުން ބޭނުންވާ ކޮންމެ ދާއިރާއަކުން މަތީ ތައުލީމު ހާސިލުކުރުމުގެ ފުރުސަތު ލިބޭގޮތަށް އުސޫލު ބަދަލުކުރައްވައިފިއެވެ. ސަރުކާރުން މިހާރު ވަނީ މި ބަދަލުތަކާއެކު އާ އުސޫލު ގެޒެޓް ކޮށްފައެވެ.

ކުރިން އަމަލުކުރަމުން އައި އުސޫލުގައި އޮންނަ ގޮތުން، ރައީސުލްޖުމްހޫރިއްޔާގެ ހާއްސަ ސްކޮލާޝިޕް ލިބޭ ދަރިވަރުންނަށް މަތީ ތައުލީމު ހާސިލުކުރުމުގެ ފުރުސަތު ލިބެނީ ހަމައެކަނި މަތީ ތައުލީމާއި ބެހޭ ވުޒާރާއިން ކަނޑައަޅާ ވަކި ދާއިރާތަކަކުންނެވެ. ނަމަވެސް، އަލަށް ގެނައި ބަދަލާއެކު ދަރިވަރުން ބޭނުންވާ ކޮންމެ ރޮނގަކުން ކުރިއަށް ދިއުމުގެ ފުރިހަމަ އިހްތިޔާރު މިހާރު ވަނީ ދީފައެވެ. މީގެ އިތުރުން، މިދިޔަ އަހަރު އޭލެވެލް ނިންމި ދަރިވަރުންގެ ތެރެއިން މި ސްކޮލާޝިޕް ހޯދި ދަރިވަރުންނަށްވެސް މި ފުރުސަތު ދިނުމަށް ވަނީ ނިންމާފައެވެ.

މި އުސޫލުގެ ދަށުން ހައި އެޗީވާސް ސްކޮލާޝިޕް ލިބޭ ދަރިވަރުންނަށްވެސް ވަނީ މުހިއްމު ބަދަލުތަކެއް ގެނެސްފައެވެ. އެގޮތުން، ރަނގަޅު ނަތީޖާ ހޯދާ ދަރިވަރުން ރާއްޖޭގައި ތިބެގެން ކިޔެވުމަށް ބާރުއެޅުމުގެ ގޮތުން، ރާއްޖޭގައި ކިޔަވާ ދަރިވަރުންނަށް ސްޓައިޕެންޑުގެ އިތުރުން މަހަކު 6,000 ރުފިޔާގެ އެލަވަންސެއް ދިނުމަށް ވަނީ ހަމަޖައްސާފައެވެ.

އަލަށް ގެޒެޓްކުރި އުސޫލުގައިވާ ގޮތުން، ރައީސުލްޖުމްހޫރިއްޔާގެ ސްކޮލާޝިޕް ލިބިގެން ކިޔަވާ ދަރިވަރުން ކިޔަވައި ނިމުމަށްފަހު 4 އަހަރާއި 7 އަހަރާ ދެމެދުގެ މުއްދަތަކަށް ސަރުކާރަށް ހިދުމަތް ކުރަން ޖެހޭނެއެވެ.

ސަރުކާރުން ގެޒެޓްކުރި މި އާ އުސޫލުގައި ދަރިވަރުންނަށް ކަންކަން ފަސޭހަވާނެ އިންތިޒާމުތަކާއި، އެހެނިހެން އެހީތެރިކަން ފޯރުކޮށްދިނުމާ ގުޅޭ ތަފްސީލުތައްވެސް ވަނީ ހިމަނާފައެވެ. މިއީ ރާއްޖޭގެ ތައުލީމީ ދާއިރާ ކުރިއެރުވުމަށާއި، މޮޅު ނަތީޖާ ހޯދާ ދަރިވަރުންނަށް އިތުރު ފުރުސަތުތައް ފަހިކޮށްދިނުމަށް ސަރުކާރުން އެޅި މުހިއްމު ފިޔަވަޅެކެވެ.