ވަރަ އެކްސްޕޯ މިއަހަރުގެ ސެޕްޓެމްބަރު މަހު ބޭއްވުމަށް ސަރުކާރުން ކަނޑައަޅައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، މިނިސްޓަރު އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް ޑރ. އަހްމަދު ހައިދަރު މުހައްމަދު ވިދާޅުވީ، ޒުވާނުންނަށާއި ވަޒީފާގެ ފުރުސަތުތަކަށް އެދޭ ފަރާތްތަކަށް ހާއްސަކޮށްގެން ބާއްވާ މި ބޮޑު އެކްސްޕޯ ކުރިއަށްދާނީ އަންނަ ސެޕްޓެމްބަރު މަހުގެ ތެރޭގައި ކަމަށެވެ.
ސެޕްޓެމްބަރު މަހުގެ ފަހު ކޮޅުގައި އެކްސްޕޯ ބާއްވާނެކަމަށް މިނިސްޓަރު ވިދާޅުވީ ނަމަވެސް ސީދާ ތާރީހެއް ހާމަކޮށްފައެއް ނުވެއެވެ.
ނިމިދިޔަ އަހަރު ބޭއްވުނު އެކްސްޕޯގައި، ތައުލީމާއި ތަމްރީނު ދޭ މަރުކަޒުތަކާއި ވަޒީފާގެ ބާޒާރުގެ އިސް ފަރާތްތައް ހިމެނޭހެން ޖުމްލަ 166 ފަރާތަކުން ބައިވެރިވެފައިވެއެވެ. މި އެކްސްޕޯގެ ތެރެއިން ވަޒީފާގެ ގިނަ ފުރުސަތުތައް ފަހިކޮށްދީފައިވާއިރު، ދާއިރާއާ ގުޅުންހުރި ތަފާތު މަސައްކަތު ބައްދަލުވުންތަކާއި ޕެނަލް ޑިސްކަޝަންތައް ވެސް ވަނީ ކާމިޔާބުކަމާއެކު ކުރިއަށް ގެންގޮސްފައެވެ.
ވަރަ އެކްސްޕޯގެ މައިގަނޑު މަގުސަދަކީ ވަޒީފާ ދޭ ފަރާތްތަކާއި ވަޒީފާ ހޯދާ ފަރާތްތައް އެއްތަނަކުން ބައްދަލުވެ، މަސައްކަތުގެ މާހައުލާ ގުޅޭ އަގުހުރި މައުލޫމާތުތައް ބަދަލުކުރުމުގެ ފުރުސަތު ފަހިކޮށްދިނުމެވެ.
މިއީ މަތީ ތައުލީމާއި، ހުނަރު ތަރައްގީކުރުމާއި، ވަޒީފާގެ ފުރުސަތުތަކަށް ހާއްސަކޮށްގެން ރާއްޖޭގައި ބާއްވާ އެންމެ ބޮޑު ހަރަކާތެވެ.
