Student loan gavaaidhun anburaa dhakkanee 40 percent kudhin: minister

ޚުލާސާ

މިނިސްޓަރު ވިދާޅުވީ ލޯނުގެ އެހީގައި ކިޔަވާ ދަރިވަރުންގެ ތެރެއިން ގަވާއިދުން ފައިސާ ދައްކަމުން އަންނަނީ ވަރަށް މަދު ކުއްޖެއްކަން ފާހަގަކުރެވިފައިވާ ކަމަށް.

މަތީ ތައުލީމަށް ސަރުކާރުން ދޫކުރާ ސްޓޫޑެންޓް ލޯނުގައި ކިޔެވުމަށް ފަހު އެ ލޯނު ގަވާއިދުން އަނބުރާ ދައްކަނީ 40 ޕަސެންޓް ކުދިން ކަމަށް ހަޔަ އެޑިއުކޭޝަން މިނިސްޓަރު ޑރ. އަލީ ހައިދަރު އަހްމަދު މިއަދު ވިދާޅުވެއްޖެ އެވެ.

ސްޓޫޑެންޓް ލޯން ގަވާއިދުން އަނބުރާ ދައްކާތޯ މަޖިލީހުގެ މިއަދު ޖަލްސާގައި މެމްބަރަކު ސުވާލުކުރެއްވުމުން ހައިދަރު ވިދާޅުވީ ލޯނުގެ އެހީގައި ކިޔަވާ ދަރިވަރުންގެ ތެރެއިން ގަވާއިދުން ފައިސާ ދައްކަމުން އަންނަނީ ވަރަށް މަދު ކުއްޖެއްކަން ފާހަގަކުރެވިފައިވާ ކަމަށެވެ.

އެ ލޯނުގެ އެހީގައި ކިޔަވާ ނިމުމަށް ފަހު އަނބުރާ ފައިސާ ދައްކަނީ 40 ޕަސެންޓް ކުދިން ކަމަށާއި އެ ފައިސާއަކީ ދައުލަތަށް ލިބެން ޖެހޭ ފައިސާއަށް ވާތީ, އެ ފައިސާ ހޯދުމަށް ކުރަން ޖެހޭ ކަންކަން ކުރުމަށް ވަރަށް އަވަހަށް ގޮތެއް ނިންމަވާނެ ކަމަށް ހައިދަރު ވިދާޅުވި އެވެ.

ހައިދަރު ވިދާޅުވީ މި އަހަރުގެ އޭޕްރީލް މަހާ ހަމައަށް 157 މިލިޔަން ރުފިޔާ ސްޓޫޑެންޓް ލޯނުގެ ގޮތުގައި ދޫކޮށްފައިވާ ކަމަށެވެ.

މަތީ ތައުލީމާއި ތަމްރީން ހޯދުމަށް ކޮންމެ އަހަރަކު ވެސް ދައުލަތުން ލޯނު ދޫކުރެ އެވެ. އަދި އެ ލޯނު އަނބުރާ ދައްކަން ފަށަން ޖެހެނީ ކިޔަވާ ނިމިގެން ހަ މަސްދުވަސް ފަހުންނެވެ.