ޤާނޫނުތަކަށް އަލަށް ގެނެވުނު އިސްލާހުތަކާއެކު ކުށުގެ ވެށްޓަށް ކުޑަކުދިން ހުށަހެޅުމަކީ ކުށެއްކަމަށް ކަނޑައަޅާފައިވާ ކަމަށާއި އަދި އެފަދަ ޢަމަލުތައް ހިންގާ ފަރާތްތައް ހައްޔަރުކޮށް ޤާނޫނީ ފިޔަވަޅު އަޅާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
އަހާ ފޯރަމްގައި ވާހަކަފުޅު ދައްކަވަމުން ވަޒީރު ވިދާޅުވީ، މިހާތަނަށް 400 އެއްހާ ކުދިން ކުށުގެ މާޙައުލުގައި އުޅޭކަމަށް ރިކޯޑުކުރެވިފައިވާ ކަމަށެވެ. އަދި ކުށަށް އަރައިގަތުމުގެ ރިސްކު އޮތް ކުދިންނާއެކު މި އަދަދު 1000 އަށްވުރެ އިތުރުވާ ކަމަށް ވަޒީރު ފާހަގަކުރެއްވިއެވެ.
މި މައްސަލަ ހައްލުކުރުމަށްޓަކައި ސަރުކާރުން "ހޯޕް އައިލެންޑް" ގެ ނަމުގައި ރަށެއް ތަރައްޤީކުރަމުންދާ ކަމަށް ވަޒީރު ވިދާޅުވިއެވެ. މި ރަށަކީ ކުށުގެ މާޙައުލުގައި ހަރަކާތްތހަރަކާތްތެރިވާ އަދި ކުށުގެ ވެށްޓަށް ހުށަހެޅުމުގެ ރިސްކު އޮތް ކުދިން އަނބުރާ މުޖުތަމަޢަށް ގެނައުމަށް ބޭނުންވާ ވަސީލަތްތަކާއެކު ތަރައްޤީކުރެވޭ ރަށެކެވެ.
ވަޒީރު އިތުރަށް ވިދާޅުވީ، ކުށުގެ ވެށިން ކުޑަކުދިން ދުރުކުރުމަށްޓަކައި އިޖުތިމާޢީ ގިނަ މައްސަލަތަކެއް ހައްލުކުރަންޖެހޭ ކަމަށެވެ. މީގެ ތެރޭގައި ބޯހިޔާވަހިކަމުގެ ދަތިކަން ހައްލުކުރުމާއި، ޤާނޫނުން ކުޑަކުދިންނަށް ލިބޭ ރައްކާތެރިކަމުގެ ނާޖާއިޒު ފައިދާ ނެގުން ހުއްޓުވުން ހިމެނެއެވެ.
ހޯޕް އައިލެންޑް އެޅެންދެން، ކުށުގެ ވެށީގައި އުޅޭ ކުދިންނަށް ސައިކޯ ސޯޝަލް އިންޓަވެންޝަން ޕްރޮގްރާމްތައް ހިންގަމުންދާ ކަމަށާއި، އެފަދަ ކުދިންނަށް ބޭނުންވާ ނަފްސާނީ ފަރުވާ ދިނުމަށް މީހުން ތަމްރީނުކުރަމުންދާ ކަމަށްވެސް ވަޒީރު ވިދާޅުވިއެވެ.
މީގެ އިތުރުން، ޖިނާއީ މައްސަލަތަކުގައި ކުށުގެ ޒިންމާ އުފުލަންޖެހޭ އުމުރު 14 އަހަރަށް ދަށްކުރުމަށް ސަރުކާރުން ނިންމާފައިވާކަން ވަޒީރު ފާހަގަކުރެއްވިއެވެ. މިއީވެސް ކުށުގެ މާޙައުލުން ކުޑަކުދިން ދުރުކުރުމަށް އެޅޭ މުހިންމު ފިޔަވަޅެއްގެ ގޮތުގައި ވަޒީރު ވިދާޅުވިއެވެ.
