ސުޕްރީމް ކޯޓުގެ ފަނޑިޔާރުންނަށް ނުފޫޒު ފޯރުވީ ކުރީގެ ފަނޑިޔާރު ހުސްނުސުޢޫދު ކަމަށް ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.
އަހާ ފޯރަމްގައި ވާހަކަފުޅު ދައްކަވަމުން ބަންޑާރަ ނައިބު ވިދާޅުވީ، ސުޕްރީމް ކޯޓަށާއި ޖުޑީޝަރީއަށް ނުފޫޒު ފޯރުވާފައި ހުރީ ހުސްނުސުޢޫދު ކަމަށް ވަރަށް ޔަޤީންކަމާއެކު ވިދާޅުވެވޭ ކަމަށެވެ.
"ސުޕްރީމް ކޯޓަށް ނުފޫޒު ފޯރުވާފައި ހުންނަވާނީ އެ ބޭފުޅާ. ޖުޑީޝަރީއަށް ނުފޫޒު ފޯރުވާފައި ހުންނަވާނީވެސް އެ ބޭފުޅާ. އަޅުގަނޑު ވަރަށް ޔަޤީންކަމާއެކު މިދަންނަވަނީ," ބަންޑާރަ ނައިބު ވިދާޅުވިއެވެ.
ބަންޑާރަ ނައިބު ވިދާޅުވި ގޮތުގައި މި ސަރުކާރު އައުމަށްފަހު، ރައީސުލްޖުމްހޫރިއްޔާއަށް ފޮނުވާފައިވާ މެސެޖުތަކާއި އެކި ތަންތަނުން ބައްދަލުވެ ދައްކާފައި ހުރި ވާހަކަތަކަށް ބަލާއިރު ނުފޫޒު ފޯރުވުމަށް މަސައްކަތް ކޮށްފައިވަނީ ހުސްނުސުޢޫދު ކަމަށް ދެކެވަޑައިގަންނަވާ ކަމަށެވެ.
އަދި މި މައްސަލައިގައި ތަޙްޤީޤެއް ކުރައްވައިފިނަމަ، އޭގެ ޖަވާބުދާރީވުމަށް ތައްޔާރަށް ހުންނެވި ކަމަށްވެސް ބަންޑާރަ ނައިބު ވިދާޅުވިއެވެ.
ބަންޑާރަ ނައިބު އިތުރަށް ވިދާޅުވީ، ހުސްނުސުޢޫދަކީ މިހާރު ސިޔާސީ ގޮތުން މަސައްކަތްކުރައްވަމުންދާ ބޭފުޅެއް ކަމަށެވެ. އަދި ސުޕްރީމް ކޯޓުގެ ފަނޑިޔާރުންނަށް ނުފޫޒު ފޯރުވުމުގެ ތުހުމަތުތައް ކުރަން ފެށީ ފަނޑިޔާރުންގެ ސުލޫކީ މައްސަލައެއް ބަލަން ފެށުމަށްފަހު ކަމަށްވެސް ބަންޑާރަ ނައިބު ފާހަގަކުރެއްވިއެވެ.
