ރާއްޖޭގެ ބޭރު ފައިސާގެ ބާޒާރު ހަމައަކަށް އަޅުވައި، މާލީ ނިޒާމުގެ ތެރޭގައި ހުރި ޤާނޫނީ ބޮޑެތި ލޫޕްހޯލްތައް ބަންދުކުރުމަށްޓަކައި ބޭރު ފައިސާގެ ޤަވާއިދުތަކަށް ބޮޑެތި އިޞްލާޙީ ބަދަލުތަކެއް ގެނައުމުގެ މަސައްކަތް ސަރުކާރުން ކުރިއަށްދާކަން ބަންޑާރަނައިބު އަޙްމަދު އުޝާމް ޔަގީންކޮށްދެއްވައިފިއެވެ.

ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ބަންޑާރަނައިބު ފާހަގަކުރެއްވި ގޮތުގައި، މޯލްޑިވްސް މޮނިޓަރީ އޮތޯރިޓީގެ ރަސްމީ ހުއްދައެއް ނެތް ފަރާތްތަކުން ބޭރު ފައިސާ މާރުކުރުމުގެ ވިޔަފާރި ހިންގުމާއި، ކަޅު ބާޒާރުގައި ޑޮލަރުގެ އަގު މަތިކޮށް އިޝްތިހާރުކުރަމުންދާ ކުރުން ހުއްޓުވުމަށް ޤާނޫނީ ގޮތުން ހަރުކަށި ފިޔަވަޅުތަކެއް އެޅޭނެ ގޮތަށް އޮނިގަނޑުތައް މިހާރު ދަނީ މުރާޖަޢާ ކުރަމުންނެވެ.

މި ބައްދަލުވުމުގައި އިކޮނޮމިކް މިނިސްޓަރު މުޙައްމަދު ސަޢީދު އަލިއަޅުއްވާލެއްވި ގޮތުގައި، ސަރުކާރުން މިހާތަނަށް އެޅި ހަރުދަނާ ފިޔަވަޅުތަކުގެ ސަބަބުން ކަޅު ބާޒާރުގައި ޑޮލަރުގެ ރޭޓް ވަނީ ވަރަށް ބޮޑަށް ތިރިކުރެވިފައެވެ. ނަމަވެސް، މި ކާމިޔާބީ ދާއިމީ ގޮތެއްގައި ދެމެހެއްޓޭނީ ޤާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސްގެން ކަމަށްވާއިރު، ބޭންކިންގ ނިޒާމުގެ ބޭރުން ހިންގާ ނާޖާއިޒު މުއާމަލާތްތައް މުޅިން ހުއްޓުވުމަށް ޚާއްޞަ އިސްކަމެއް ދެވޭނެއެވެ.

ޤާނޫނަށް ގެނެވޭ ބަދަލުތަކުގެ ސަބަބުން ރާއްޖޭގައި ރަސްމީކޮށް ވިޔަފާރިކުރާ ދިވެހި ކުންފުނިތަކަށް ފުރިހަމަ ޙިމާޔަތް ލިބި، މުޅި އިޤްތިޞާދަށް އޭގެ ސަބަބުން ހަމަޖެހުން ލިބިގެންދާނެ ކަމަށް މިނިސްޓަރު ވިދާޅުވިއެވެ.

ހޯމް މިނިސްޓަރު ޢަލީ އިޙްސާން ވެސް ވަނީ ޤަވާއިދާ ޚިލާފަށް ބޭރު ފައިސާގެ ވިޔަފާރިކުރާ ފަރާތްތަކާ މެދު ސަލާމަތީ ބާރުތަކުން ފިޔަވަޅު އަޅަމުންދާކަން ހާމަކުރައްވައި، ޤާނޫނީ ގޮތުން މި ގެނެވޭ ބަދަލުތަކާއެކު ތަންފީޒީ އިދާރާތަކަށް މިފަދަ ކުށްތައް ހުއްޓުވުމަށް އިތުރު ބާރެއް ލިބިގެންދާނެކަން ފާހަގަކުރައްވާފައެވެ.