ލޯކަލް ކައުންސިލް އިންތިހ'ާބާއެކު ގާނޫނުއަސާސީއަށް ގެންނަ އިސްލާހުތަކާ ގުޅޭ ފެންނަ ނުފެންނަ ވޯޓު ނެގުމަށް ނިންމީ ދައުލަތުގެ ބަޖެޓުން ކުރަންޖެހޭ ހަރަދު އެތައް ގުނައެއް ކުޑަވާނެތީ ކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ.

ބަންޑާރަނައިބު މިފަދައިން ވިދާޅުވީ، ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުމަށް ސަރުކާރުން ގެންގުޅޭ އެޖެންޑާއާ ގުޅޭގޮތުން ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ފާޅުކުރެއްވި ހިޔާލަކަށް ރައްދު ދެއްވަމުންނެވެ.

ބަންޑާރަނައިބު ވިދާޅުވީ، މިހާރު އަމަލުކުރަމުންދާ ގާނޫނުއަސާސީގައި އިސްލާހު ކުރަންޖެހޭ މުހިންމު ކަންތައްތަކެއް ހުރިކަން އެންމެންވެސް ގަބޫލުކުރާ ކަމަށެވެ. އެގޮތުން ސަރުކާރުގެ ފަރާތުން މަޖިލީހަށް ހުށަހަޅަން ނިންމާފައިވާ ތިން އިސްލާހުގެ ތެރޭގައި ހިމެނެނީ ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުމާއި، ޖުޑީޝަލް ސާވިސް ކޮމިޝަން (ޖޭއެސްސީ) އެކުލެވިގެންވާ ގޮތް ބަދަލުކުރުމުގެ އިތުރުން މަޖިލިސް މެންބަރުންގެ އަދަދު އިތުރުވަމުންދާ މައްސަލައަށް ހައްލެއް ހޯދުމެވެ.

އުޝާމް ފާހަގަކުރެއްވި ގޮތުގައި، ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުމަށް ގެންނަ އިސްލާހަކީ، އެއަށް އަމަލުކުރަން ފެށުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނެގުމަށް ގާނޫނުއަސާސީން ލާޒިމްކުރާ ކަމެކެވެ. ނަމަވެސް ދެން ހުށަހަޅާ އިސްލާހުތަކަކީ އެފަދަ ވޯޓެއް ލާޒިމްކުރާ ކަންކަން ނޫން ކަމަށް އޭނާ ވިދާޅުވިއެވެ.

ހަރަދުތަކާ ގުޅޭގޮތުން ވާހަކަދައްކަވަމުން ބަންޑާރަނައިބު ވިދާޅުވީ، މުޅި ރާއްޖޭގައި ވަކިން ފެންނަ ނުފެންނަ ވޯޓެއް ބާއްވާނަމަ މަދުވެގެން 80 މިލިއަން ރުފިޔާ ހޭދަވާނެ ކަމަށެވެ. އެހެންކަމުން، ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް މި ވޯޓު ނެގުމުން ދައުލަތުގެ ބަޖެޓަށް ބޮޑު ލުޔެއް ލިބިގެންދާނެ ކަމަށް އޭނާ ވިދާޅުވިއެވެ.

މީގެ އިތުރުން، ގާނޫނުއަސާސީއަށް ގެންނަން ބޭނުންވާ އެހެނިހެން އިސްލާހުތައްވެސް މާލަސްތަކެއް ނުވެ މަޖިލީހަށް ހުށަހަޅުއްވާނެ ކަމަށާއި، މިހާރު ކުރިއަށްދަނީ އެކަމުގެ އެންމެ ފަހުގެ މަޝްވަރާތައް ކަމަށް އުޝާމް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އަންނަ މަހުގެ 4 ވަނަ ދުވަހު މި ފެންނަ ނުފެންނަ ވޯޓު ނެގުމަށް ހުށަހަޅުއްވާފައެވެ.