އޭޕްރީލް މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ (އ.ތ.މ) ކޮމެޓީގެ އިންތިހާބުގެ ދާއިމީ ނަތީޖާ އިލެކްޝަންސް ކޮމިޝަނުން އާންމުކޮށްފި އެވެ. މި ނަތީޖާ ދައްކާގޮތުން ޖުމްލަ ގޮނޑީގެ އަދަދުން ކުރީގައި އުޅެނީ ސަރުކާރު ހިންގާ ޕީއެންސީ އެވެ.
އިލެކްޝަންސް ކޮމިޝަނުން އާންމުކޮށްފައިވާ ތަފާސްހިސާބުތަކަށް ބަލާއިރު، ދެ އިންތިހާބުން މުޅި ޖުމްލަ ޕީއެންސީއަށް 584 ގޮނޑި ލިބިފައިވެ އެވެ. އިދިކޮޅު އެމްޑީޕީއަށް ލިބިފައިވަނީ 563 ގޮނޑި އެވެ. މިއާއެކު ޕީއެންސީން އިންތިހާބު ކާމިޔާބުކޮށްފައިވަނީ 21 ގޮނޑީގެ ފަރަގަކުންނެވެ.
Advertisement
ޕީއެންސީއަށް މުޅި ރާއްޖެއިން ގިނަ ގޮނޑިތަކެއް ލިބުނު ނަމަވެސް، ސިޓީތަކުގެ ނަތީޖާއަށް ބަލާއިރު ކުރިހޯދާފައިވަނީ އެމްޑީޕީ އެވެ. އެގޮތުން ހުރިހާ ސިޓީތަކެއްގެ މޭޔަރުންގެ ގޮނޑިއާއި، ސިޓީ ކައުންސިލްތަކުގެ އަގުލަބިއްޔަތު ނަގާފައިވަނީ އެމްޑީޕީންނެވެ. ސިޓީ ކައުންސިލް މެންބަރުންގެ ގޮނޑިތަކަށް ބަލާއިރު އެމްޑީޕީން 41 ގޮނޑި ކާމިޔާބުކުރިއިރު، ޕީއެންސީއަށް ލިބުނީ އެންމެ 5 ގޮނޑި އެވެ. އަދި އަމިއްލަ ގޮތުން ވާދަކުރި ކެންޑިޑޭޓަކު ވަނީ 1 ގޮނޑި ކާމިޔާބުކޮށްފަ އެވެ.
މީގެ އިތުރުން ސިޓީތަކުގެ އ.ތ.މ ކޮމެޓީގެ ރައީސާ ކަމުގެ ހުރިހާ ގޮނޑިއެއް އެމްޑީޕީން ކާމިޔާބުކުރިއިރު، އެ ކޮމެޓީތަކުގެ މެންބަރުންގެ ގޮނޑިތަކުންވެސް ކުރިހޯދީ އެމްޑީޕީ އެވެ. އެމްޑީޕީން 42 ގޮނޑި ހޯދިއިރު، ޕީއެންސީއަށް ލިބުނީ 4 ގޮނޑި އެވެ.
ރަށު ކައުންސިލްތަކުގެ ނަތީޖާއަށް ބަލާއިރު، ރަށު ކައުންސިލްތަކުގެ ރައީސުންގެ ގޮނޑި އެންމެ ގިނައިން ކާމިޔާބުކުރީ ޕީއެންސީންނެވެ. އެ ޕާޓީން 75 ގޮނޑި ކާމިޔާބުކުރިއިރު، އެމްޑީޕީއަށް ލިބުނީ 73 ގޮނޑިއެވެ. އަމިއްލަ ގޮތުން 24 ގޮނޑި، އެމްޑީއޭއިން 4 ގޮނޑި، އަދި ޖޭޕީ އާއި ޑިމޮކްރެޓްސް އިން ކުރެ ކޮންމެ ޕާޓީއަކުން 1 ގޮނޑި ކާމިޔާބުކުރި އެވެ.
ރަށު ކައުންސިލްތަކުގެ އަންހެނުންނަށް ހާއްސަ ގޮނޑިތަކުން ޕީއެންސީން 101 ގޮނޑި ކާމިޔާބުކުރިއިރު، އެމްޑީޕީއަށް ލިބުނީ 88 ގޮނޑި އެވެ. އަދި ކައުންސިލް މެންބަރުންގެ ގޮނޑިތަކުގެ ތެރެއިން 99 ގޮނޑި ޕީއެންސީން ނެގިއިރު، އެމްޑީޕީއަށް ލިބުނީ 82 ގޮނޑި އެވެ. ރަށު އ.ތ.މ ކޮމެޓީގެ މެންބަރުންގެ ގޮނޑިތަކުންވެސް 216 ގޮނޑިއާއެކު ކުރީގައި އުޅެނީ ޕީއެންސީ އެވެ.
މުޅި އިންތިހާބުގެ ޖުމްލަ ނަތީޖާއަށް ބަލާއިރު، އަމިއްލަ ގޮތުން ވާދަކުރި ކެންޑިޑޭޓުން 169 ގޮނޑި ކާމިޔާބުކުރި އެވެ. އެމްޑީއޭއިން 23 ގޮނޑި، އަދާލަތު ޕާޓީން 6 ގޮނޑި، ޖުމްހޫރީ ޕާޓީން 4 ގޮނޑި އަދި ޑިމޮކްރެޓްސް އިން 2 ގޮނޑި ވަނީ ހޯދާފައެވެ. ފާހަގަކޮށްލެވޭ ގޮތުގައި ކުރީގެ ރައީސް ޔާމީން އިސްވެ ހުންނަވައި އުފެއްދެވި ޕީއެންއެފްއަށް މި އިންތިހާބުގައި އެއްވެސް ގޮނޑިއެއް ކާމިޔާބު ކުރެވިފައެއް ނުވެ އެވެ.
