ދ. މީދޫ ކައުންސިލްގެ ރައީސް ހޮވުމަށް މިއަދު ބޭއްވި ބައި-އިލެކްޝަން، ސަރުކާރު ހިންގާ ޕީއެންސީގެ ކެންޑިޑޭޓް ސުހާ އިބްރާހިމް ބޮޑު ތަފާތަކުން ކާމިޔާބުކޮށްފިއެވެ.
މިއަދު ހެނދުނު 8:00 އިން ހަވީރު 4:00 އަށް ކުރިއަށްދިޔަ މި އިންތިހާބުގައި ވާދަކުރީ ޕީއެންސީގެ ސުހާ އިބްރާހިމާއި އެމްޑީއޭގެ ކެންޑިޑޭޓް މުހައްމަދު ޝާހިދެވެ. ވަގުތީ ނަތީޖާ ދައްކާ ގޮތުން ސުހާ އިންތިހާބު ކާމިޔާބުކުރީ 80 ވޯޓުގެ ތަފާތުންނެވެ. އޭނާއަށް ޖުމްލަ 529 ވޯޓު ލިބުނުއިރު، ޝާހިދަށް ލިބުނީ 449 ވޯޓެވެ.
މި އިންތިހާބުގައި ވޯޓުލުމުގެ ހައްގު ލިބިފައިވާ 1,409 މީހުންގެ ތެރެއިން 978 މީހަކު ވޯޓުލާފައިވެއެވެ. ވޯޓުލުމަށްޓަކައި މީދޫގައި ދެ ފޮށި އަދި މާލޭގައި އެއް ފޮށި ބަހައްޓާފައިވާއިރު، ތިން ފޮށިން ވެސް ކުރި ހޯއްދެވީ ސުހާއެވެ.
Advertisement
މީދޫ ކައުންސިލްގެ ރައީސްގެ އިންތިހާބު އަލުން ބާއްވަން ޖެހުނީ، މިދިޔަ އޭޕްރީލް މަހު ބޭއްވި ލޯކަލް ކައުންސިލް އިންތިހާބުގެ ނަތީޖާއާ މެދު ހައިކޯޓުން ކުރި ހުކުމަކާ ގުޅިގެންނެވެ. އެފަހަރުގެ އިންތިހާބުގައި ސުހާ އާއި ޝާހިދުގެ ވޯޓު އެއްވަރުވީ، ސުހާއަށް ލިބުނު ދެ ވޯޓެއް ބާތިލު ކަމަށް އިލެކްޝަންސް ކޮމިޝަނުން ނިންމުމާ ގުޅިގެންނެވެ. ނަމަވެސް، ހައިކޯޓަށް ހުށަހެޅި މައްސަލައިގައި ކޯޓުން ނިންމީ ބާތިލުކުރި އެއް ވޯޓަކީ ސައްހަ ވޯޓެއް ކަމަށެވެ. އެއާއެކު ދެ ކެންޑިޑޭޓުންގެ ވޯޓު އެއްވަރުވުމުން، އީސީން ނިންމީ އަލުން ބައި-އިލެކްޝަނެއް ބޭއްވުމަށެވެ.
މިއަދުގެ ނަތީޖާއާއެކު މީދޫ ކައުންސިލްގެ ހުރިހާ ގޮނޑިއެއް މިހާރު ވަނީ ޕީއެންސީން ކާމިޔާބުކޮށްފައެވެ. އެގޮތުން ކައުންސިލް މެމްބަރުކަން ޕީއެންސީގެ ހުސައިން ރަޝީދު ކާމިޔާބުކޮށްފައިވާއިރު، އަންހެނުންނަށް ހާއްސަ ގޮނޑި ކާމިޔާބުކުރީ އެ ޕާޓީގެ މިސްކާ އަބްދުލް ރަހްމާނެވެ.
މީދޫގެ ކައުންސިލްގެ މޖުލަސް މިހާރު ފުރިހަމަވެފައިވަނީ ސަރުކާރު ހިންގާ ޕީއެންސީގެ ފުރިހަމަ އަގުލަބިއްޔަތާ އެކުގައެވެ.
