ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަކީ ދިވެހިރާއްޖޭގެ ތިން ބާރު ވަކިވެފައި އޮންނަ ދުސްތޫރީ ނިޒާމަށް އެއްވެސް ބަދަލެއް އަންނާނެ ކަމެއް ނޫން ކަމަށް ބަނޑާރަ ނައިބު އަހުމަދު އުޝާމް ވިދާޅުވެއްޖެއެވެ. ބަންޑާރަ ނައިބު މިހެން ވިދާޅުވީ، ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަފުޅު ދައްކަވަމުންނެވެ.
ދެ އިންތިހާބު އެއްކޮށް ބޭއްވުމަކީ ރާއްޖޭގެ ދުސްތޫރީ ނިޒާމަށް ގެންނަ ބޮޑު ބަދަލެއް ކަމަށް ބައެއް ފަރާތްތަކުން ކުރާ ތުހުމަތުތަކަށް ރައްދު ދެއްވަމުން އުޝާމް ވިދާޅުވީ، މިއީ އިންތިހާބީ އޮނިގަނޑަށް އަންނަ ބަދަލެއް ނަމަވެސް، މިއީ ރާއްޖޭގެ އަސާސީ ދުސްތޫރީ އޮނިގަނޑަށް ގެނެވޭ ބަދަލެއް ނޫންކަމަށެވެ.
"ގާނޫނު އަސާސީގައި އޮތް އެންމެ މުހިންމު އެއް ކަންތައް އެއީ ތިން ބާރު ވަކިވެފައި އޮންނަ ނިޒާމެއް ރާއްޖޭގައި އޮތުން. މި ބަދަލު ގެނަޔަސް ދުސްތޫރީ ނިޒާމަށް އެއްވެސް ބަދަލެއް ނާންނާނެ. ދެވަނަ ކަމަކަށް ރައްޔިތުންގެ ވޯޓުން ރައީސަކު ހޮވުން. އަދި ރައްޔިތުންގެ ވޯޓުން ރައްޔިތުންގެ މަޖިލީހުގެ މެމްބަރަކު ހޮވުން. އެކަމަށްވެސް އެއްވެސް ބަދަލެއް އަންނާނެ ކަމުން އަސްލު ދުސްތޫރީ ނިޒާމަަށް އެއްވެސް ބަދަލެއް ނާންނާނެ ކަމަށް އަޅުގަނޑަަށް ގަބޫލުކުރެވެނީ،" ބަންޑާރަ ނައިބު ވިދާޅުވިއެވެ.
Advertisement
މީގެ އިތުރުން، މި ބަދަލަކީ އެކަށީގެންވާ މަޝްވަރާ ނުކޮށް އަވަސްއަރުވާލައިގެން ގެންނަ ބަދަލެއް ކަމަށް ދެކެވޭ ވާހަކަތައްވެސް ބަންޑާރަ ނައިބު ވަނީ ދޮގުކުރައްވާފައެވެ. އޭނާ ވިދާޅުވީ މިއީ ސަރުކާރުން ވަރަށް ބޮޑަށް ދިރާސާކޮށް، މަޖިލީހުގައި ފުޅާ ދާއިރާއެއްގައި ބަހުސްކުރެވި، ސިޔާސީ ޕާޓީތަކާއި އާންމުންގެ ހިޔާލުވެސް ހޯދައިގެން ކުރިއަށްގެންދާ މަސައްކަތެއް ކަމަށެވެ.
އުޝާމް ފާހަގަކުރެއްވި ގޮތުގައި މަޖިލީހުން ބިލު ފާސްކުރުމަށްފަހު އޭޕްރީލް 4 އާ ހަމައަށް ރައްޔިތުން ހޭލުންތެރިކުރުމާއި އިތުރަށް މަޝްވަރާކުރުމުގެ ފުރުސަތު އެބައޮތެވެ. އެހެންކަމުން މިއީ ޒިންމާދާރުކަމާއެކު ކުރިއަށްދާ ކަމެއް ކަމަށް އޭނާ ވިދާޅުވިއެވެ.
އަންނަ މަހުގެ 4 ވަނަ ދުވަހު ބާއްވާ ވޯޓުގައި ރައްޔިތުންގެ ފެންނަ ނުފެންނަ ވޯޓެއް ނެގުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވީ، ޤާނޫނުއަސާސީއަށް މަޖިލީހުން ގެނައި އިސްލާޙު ތަސްދީޤު ކުރުމާ ގުޅޭގޮތުންނެވެ. މި އިސްލާޙަކީ ރާއްޖޭގެ ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމަށް މަގުފަހިކުރުމަށް ހުށަހަޅާފައިވާ ބަދަލެކެވެ.
