ރާއްޖޭގެ ރައީސުލްޖުމްހޫރިއްޔާ ޑރ. މުހައްމްދު މުއިއްޒު ބަންޑާރާ ނައިބުގެ އޮފީސް (އޭޖީ)ގެ އާ ވެބްސައިޓު އިފްތިތާހު ކޮށްދެއްވައިފި އެވެ.
އެ ވެބްސައިޓް އިފްތިތާހުކޮށްފައިވަނީ ބަންޑާރަނައިބުގެ އޮފީހަށް 75 އަހަރު ފުރުމުގެ މުނާސަބަތުގައި ބޭއްވި ހާއްސަ ޖަލްސާގަ އެވެ.
ރޭގައި ބޭއްވި އެ ޖަލްސާގައި ރައީސް ވަނީ ”އަލިމަސް ޔޫބީލް ހަނދާނީ ފޮތް“ ނެރުއްވުމުގެ އިތުރުން، ބަންޑާރަނައިބުގެ އޮފީހުގެ އާ ވެބްސައިޓް އިފްތިތާހުކުރައްވާފަ އެވެ. އަދި އެ އޮފީހަށް 20 އަހަރަށް ވުރެ ދިގު މުއްދަތަކަށް ހިދުމަތްކުރައްވާފައިވާ މުވައްޒަފުންނަށް އިނާމު ހަވާލުކޮށްދެއްވާފައިވެސްވެ އެވެ.
އިތުރަށް 15 އަހަރާއި 20 އަހަރާ ދެމެދުގެ މުއްދަތަކަށް ޖިދުމަތްކޮށްފައިވާ މުވައްޒަފުންނަށް އިނާމު ހަވާލުކޮށްދެއްވީ ބަންޑާރަނައިބު އަހުމަދު އުޝާމެވެ. އަދި ބަންޑާރަނައިބުގެ އޮފީހުގެ ފަރާތުން ރައީސުލްޖުމްހޫރިއްޔާއަށް ހަނދާނީ ފިލައެއް އަރުވާފައިވެ އެވެ.
އެ ޖަލްސާގައި އަލިމަސް ޔޫބީލް ފާހަގަކުރުމަށް ރައްޔިތުންގެ މަޖިލީހުގެ އިސްވެރިންނާއި ޝަރުއީ ކޯޓުތަކުގެ އިސްވެރިންގެ އިތުރުން ކުރީގެ ބަންޑާރަނައިބުން ބައިވެރިވެވަޑައިގެންނެވި އެވެ. މީގެ އިތުރުން ބަންޑާރަނައިބުގެ އޮފީހުގައި މީގެ ކުރިން ހިދުމަތްކުރައްވާފައިވާ އަދި މިހާރުވެސް ހިދުމަތްކުރައްވަމުން ގެންދަވާ ގިނަ އަދަދެއްގެ މުވައްޒަފުން ވެސް ބައިވެރިވި އެވެ.
