2013 ވަނަ އަހަރު ރާއްޖޭގެ ވެރިކަމަށް ހޮވުނު ކާމިނީގޭ އަބްދުﷲ ޔާމީން ނުވަތަ ކުރީގެ ރައީސް ޔާމީނުގެ ޕީޕަލްސް ނެޝަނަލް ފްރަންޓް (ޕީއެންއެފް)ގެ ޖަލްސާގައި ނޫސްވެރިޔަކަށް ފުރައްސާރަކޮށްފައި ވާތީ، ވަކިވަކި ނޫސްވެރިންނަށް ފުރައްސާރަކުރާ މަންޒަރު ބްރޯޑްކާސްޓް ކުރުމުގައި ސަމާލުވުމަށް މޯލްޑިވްސް ބްރޯޑްކާސްޓް ކޮމިޝަނުން އަންގައިފިއެވެ.
ޕީއެންއެފްގެ އޮފީހުގައި ރޭ ބޭއްވި ޖަލްސާގައި ނޫސްވެރިޔަކާއި ގުޅުވައިގެން އެންމެ ފުރަތަމަ ވާހަކަ ދެއްކީ އެ ޕާޓީގެ އެކްޓިވިސްޓު ވަހީދެވެ. އޭނާގެ ވާހަކަތަކުގައި އެޕާޓީގެ ލީޑަރު ކާމިނީގޭ ޔާމީނު ވެސް ބައިވެރިވެވަޑައިގެންނެވިއެވެ.
އެ ވާހަކައިގެ ތެރެއަށް ޔާމީނުގެ ވެރިކަމުގައި އެންމެ ފުރަތަމަ ހުންނެވި ނައިބުރައީސް ޑރ. ޖަމީލް ވެސް ބައިވެރިވިއެވެ.
Advertisement
ބްރޯޑްކޮމުން ނެރުނު އެންގުމެއްގައި ބުނެފައިވަނީ އެކި ފޯރަމްތަކުގައި ވަކިވަކި ނޫސްވެރިންނަށް ފުރައްސާރަކުރަންދާ ކަން އެ ކޮމިޝަންގެ ސަމާލުކަމަށް އައިސްފައިވާ ކަމަށެވެ.
އެހެންކަމުން ވަކިވަކި ނޫސްވެރިންނާ ގުޅިގެން މުހާތަބު ކުރާއިރު، ޒާތީ ތައައްސުބުން އެއްކިބާވެ، އިހުތިރާމާއެކު ކޮންޓެންޓު ގެނެސްދިނުމަށް ބްރޯޑްކޮމުން ވަނީ އެދިފައެވެ.
އަދި މިފަދަ ގޮތްގޮތަށް ނޫސްވެރިންނަށް އަމާޒުކޮށް ދެކެވޭ ވާހަކަތައް ބްރޯޑްކާސްޓުކުރުމުގައި ސަމާލުކަން ދިނުމަށް ވެސް ކޮމިޝަނުން ވަނީ އިލްތިމާސް ކޮށްފައެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި ކުރީގެ ރައީސް ޔާމީނުއާއި، ޑރ. ޖަމީލާއި އެ ޕާޓީގެ އިސް އެކްޓިވިސްޓު އަހުމަދު މުހައްމަދު ވަހީދު (ވައްޑެ)ނޫސްވެރިޔަކަށް ފުރައްސާރަކޮށް ވަރަށް ބޮޑަށް ޖޯކު ޖަހާ މަންޒަރު ފެނެއެވެ.
އެކަމާއި ގުޅިގެން މީސްމީޑިއާގައި މީހަކު ކޮށްފައިވާ ކޮމެންޓެއްގައި ބުނެފައިވަނީ ޔާމީނަކީ ރައްޔިތުންގެ ލޭ ވެސް ބޯން ލިބިއްޖެއްޔާ ބޯނެ މީހެއް ކަމަށާއި، އޭނާގެ އަސްލު ސޫރަ ރައްޔިތުންނަށް މިހާރު ދަނީ ފެންނަމުން ކަމަށެވެ.
