2018 ވަނަ އަހަރުގެ ރިޔާސީ އިންތިޚާބުން ރައީސް ޔާމީން ނާކާމިޔާބުވެވަޑައިގަތީ އެކި ފަރާތްތަކުން ލިބުނު ކެމްޕޭން ފައިސާ އަށް ވީ ގޮތް ނޭނގުމުގެ އިތުރުން، ސުޕްރީމް ކޯޓުގެ ފުރާޅުން ޓިނު ނެގި މައްސަލަ އާއި ސިޔާސީ ލީޑަރުން ހައްޔަރުކޮށް ޖަލަށް ލުމުގެ ސަބަބުން ކަމަށް ވިދާޅުވެ، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ހިންގާފައިވާ ކަންކަމަށް ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާހު، ރޭ ވަރަށް ބޮޑަށް ފާޑުވިދާޅުވެއްޖެއެވެ.

ޕީއެންސީގެ މިއަހަރުގެ ބޮޑު ކޮންގްރެސްގެ ނިމުން ފާހަގަކުރުމަށް ބޭއްވި ޖަލްސާގައި ވާހަކަދައްކަވަމުން ފަލާހު ވިދާޅުވީ ޔާމީނުގެ ވެރިކަމުގައި ރައްޔިތުންގެ އިތުބާރު މުޅިން ގެއްލިގެން ދިޔައީ ހިންގާފައިވާ ހަރުކަށި އަދި އަނިޔާވެރި އަމަލުތަކުގެ ސަބަބުންނެވެ.

ފަލާހުގެ ވާހަކަފުޅުގައި 2018 ވަނަ އަހަރުގެ ފެބުރުއަރީ 1 ގެ ސުޕްރީމް ކޯޓުގެ އަމުރާއި ގުޅިގެން ހިނގާދިޔަ ހާދިސާތަކަށް އިޝާރާތްކުރައްވައި ވިދާޅުވީ، ކޯޓުތަކުގެ މައްޗަށް އަތްގަދަކޮށް ފަނޑިޔާރުން ހައްޔަރުކުރުމަކީ ރައްޔިތުން ބަލައިގަތް ކަމެއް ނޫން ކަމަށެވެ. އަދި އޭގެ އިތުރުން، އަމިއްލަ ޕާޓީގެ އިސް ބޭފުޅުންނާއި ގައުމުގެ ހުރިހާ ސިޔާސީ ލީޑަރުން ޖަލަށްލައި ހިންގި ކަންކަމުގެ ނަތީޖާ އަކީ ރައްޔިތުން އެ ބިރުވެރިކަމާއި ދެކޮޅަށް ތެދުވެ ވޯޓުން ޔާމީންގެ ވެރިކަން ނިމުމަކަށް ގެނައުން ކަމަށް އޭނާ ސިފަކުރެއްވިއެވެ.

މީގެ އިތުރުން، ރައީސް ޔާމީންގެ އެކައުންޓްތަކުގައި ހުރި ފައިސާގެ މައްސަލަތަކަށް ރިއާޔަތްކުރައްވައި ފަލާހު ވިދާޅުވީ، ކޮރަޕްޝަނާއި ވައްކަމުގެ ވާހަކަ މިއަދު ރައީސް ޔާމީން ދެއްކެވުމަކީ ހައިރާންވާންޖެހޭ ކަމެއް ކަމަށެވެ.

އަދި މިހާރުގެ ރައީސް ޑރ. މުހައްމަދު މުއިއްޒުގެ ވެރިކަމަކީ ހަމަޖެހުމާއި ގާނޫނީ އިމުގެ ތެރެއިން ކަންކަން ނިންމާ އޯގާތެރި ވެރިކަމެއްކަން ފާހަގަކުރައްވައި، ޕީއެންސީގެ ސަފުތައް އޮތީ ބަދަހިކޮށް ކަމަށާއި، އަދި ކުރިޔަށް އޮތްތަނުގައި ވެސް ރައީސް މުއިއްޒުގެ ސިޔާސަތުތަކަށް ފުރިހަމައަށް ތާއީދުކުރުމަށް އެ ޕާޓީގެ މެންބަރުންނަށް ފަލާހު ގޮވާލެއްވިއެވެ.