ސްޓޭޓް ބޭންކް އޮފް އިންޑިއާ (އެސްބީއައި) އަށް ދިވެހި ސަރުކާރުން ވިއްކި ޓީ ބިލުން މި މަހު އަނބުރާ ދައްކަން ޖެހޭ 50 މިލިއަން ޑޮލަރު އަނބުރާ ދެއްކުން އިންޑިއާ ސަރުކާރުން އަނެއްކާ ވެސް ފަސްކޮށްދީފި އެވެ.
ފޮރިން މިނިސްޓަރު ޑރ. އަބްދުﷲ ހަލީލް މިއަދު އެކްސްގައި ކުރެއްވި ޕޯސްޓެއްގައި ވަނީ އެ ޓީބިލު އަނބުރާ ދެއްކުން އަނެއްކާވެސް އިންޑިއާއިން ފަސްކޮށްދީފައިވާ ކަން ހާމަކުރައްވައިފަ އެވެ. އަދި އިންޑިއާގެ ފޮރިން މިނިސްޓަރު ޖައިޝަންކަރު އާއި އިންޑިއާގެ ސަރުކާރަށް ހަލީލް ޝުކުރު އަދާކުރެއްވި އެވެ.
"މިވަގުތަށް ބޭނުންވެފައިވާ މި އެހީތެރިކަން ހަމަޖައްސައިދިނުމުން ދައްކުވައިދެނީ ރާއްޖެ އާއި އިންޑިއާއާ ދެމެދު އޮތް ރަހުމަތްތެރިކަމުގެ ބަދަހިގުޅުން. އަދި މި އެހީގެ ސަބަބުން ރާްއްޖޭގެ އިގުތިސާދު ހަމަޔަކަށް އެޅުވުމަށް ސަރުކާރުން ކުރިއަށް ގެންދާ އިސްލާހީ ފިޔަވަޅުތައް އެޅުމުގެ މަސައްކަތަށް ބޮޑު އެހީތެރިކަމެއް ލިބޭނެ," ހަލީލް ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 2019 ވަނަ އަހަރު ވަނީ އެސްބީއައި މެދުވެރިކޮށް ބަޖެޓް ސަޕޯޓަށް 200 މިލިއަން ޑޮލަރުގެ ނަގައިފަ އެވެ. އޭގެ ތެރެއިން 50 މިލިއަން ޑޮލަރަކީ އިންޑިއާ އިން ދިން ހިލޭ އެހީ އެވެ.
ބާކީ 150 މިލިއަން ޑޮލަރު ލިބުނީ 50 މިލިއަން ޑޮލަރުގެ ތިން ޓީބިލްގެ ގޮތުގަ އެވެ. އެ ފައިސާގެ ތެރެއިން, މިދިޔަ އަހަރުގެ ޖެނުއަރީ މަހު ވަނީ 50 މިލިއަން ޑޮލަރު (770 މިލިއަން ރުފިޔާ)ގެ އެއް ޓީބިލް މި ސަރުކާރުން އަނބުރާ ދައްކައިފަ އެވެ. ބާކީ ނުދައްކާ ހުރި 100 މިލިއަން ޑޮލަރުގެ ތެރެއިން 50 މިލިއަން ޑޮލަރު މިދިޔަ އަހަރުގެ މެއި މަހު އަނބުރާ ދައްކަން ޖެހިފައި ވަނިކޮށް އެ ފައިސާ ވެސް އިންޑިއާ ސަރުކާރުން އިތުރު އެއް އަހަރަށް ފަސްކޮށްދިނެވެ. މިފަހަރު ވެސް އެ މުއްދަތު އިތުރުކޮށްދިނީ އެއް އަހަރަށް ކަން ވަނީ އެނގިފަ އެވެ.
