ސަސްޅެންޝަނުގައި ހުންނެވި ސުޕްރީމް ކޯޓުގެ ފަނޑިޔާރުކަމުން ޑރ. އަޒްމިރަލްދާ ޒާހިރު އާއި މަހާޒު އަލީ ޒާހިރު ވަކިކުރުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިއަދު ބޭއްވި ސިއްރު ބައްދަލުވުމެއްގައި ނިންމައިފިއެވެ.

މި ދެ ފަނޑިޔާރުން މަޤާމުން ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ރައްޔިތުންގެ މަޖިލީހަށް ހުށަހެޅުމާ ގުޅިގެން، އެ މައްސަލަ ދިރާސާކުރުމުގެ މަސައްކަތް ކުރީ ޖުޑީޝަރީ ކޮމިޓީންނެވެ. ޖޭއެސްސީން މި ދެ ފަނޑިޔާރުން ވަކިކުރަން ނިންމީ، މިދިޔަ ޑިސެމްބަރު 4 ވަނަ ދުވަހު ކްރިމިނަލް ކޯޓަށް ހާޒިރުކުރރުކުރެވުނު މައްސަލައަކާ ގުޅިގެން ކްރިމިނަލް ކޯޓުގެ ގާޒީންނަށް ނުފޫޒު ފޯރުވާފައިވާކަން ސާބިތުވެފައިވާތީ ކަމަށް ބުނެފައިވެއެވެ.

މިއަދުގެ ކޮމިޓީ ބައްދަލުވުން ހޫނުވެ، އިދިކޮޅު އެމްޑީޕީން ވަނީ ކޮމިޓީ ބޮއިކޮޓްކޮށްފައެވެ. އިއްޔެ ބޭއްވުނު ބައްދަލުވުމުގައި، ކެންދޫ ދާއިރާގެ މެންބަރު މައުރޫފް ޒާކިރު ވަނީ ދެ ފަނޑިޔާރުން ކޮމިޓީއަށް ހާޒިރުކުރުމަށް ހުށަހަޅުއްވައިފައެވެ. ނަމަވެސް އެ ހުށަހެޅުން ފާސްވެފައެއް ނުވެއެވެ.

ޖޭއެސްސީން ބުނެފައިވާ ގޮތުގައި، މި ދެ ފަނޑިޔާރުންގެ އަމަލަކީ ޤާނޫނުއަސާސީގެ 142 ވަނަ މާއްދާއާއި، ދިވެހިރާއްޖޭގެ ފަނޑިޔާރުންގެ ޤާނޫނުގެ ބައެއް މާއްދާތަކާއި، ފަނޑިޔާރުންގެ ސުލޫކީ މިންގަނޑާ ޚިލާފު އަމަލެކެވެ.

މި މައްސަލައިގައި ޖުޑީޝަރީ ކޮމިޓީން ނިންމި ނިންމުން ރައްޔިތުންގެ މަޖިލީހުގެ ތަޅުމަށް ހުށަހަޅައި، އެ ތަނުން ފާސްވުމުން، މި ދެ ފަނޑިޔާރުން ވަކިވާނެއެވެ.