Dhuniyeah libifaivaa kurierumuge hageegee bathalunnakee mamma in: Raees

ޚުލާސާ

މަންމައިންގެ ދުވަހަކީ މޭ 11. މި ދުވަސް ފާހަގަކުރަނީ މައިވަންތަ ލޯތްބާއިއެކު ހަރުދަނާ ދަރިންތަކެއް ބިނާކޮށް، ޤައުމުގެ ކުރިއެރުމުގައި މަންމައިންގެ ކުރާ އަގުހުރި ދައުރު ފާހަގަކުުމުގެ ގޮތުން.

ދުނިޔެ ދެކެމުންދާ ކުރިއެރުމާއި ކާމިޔާބީގެ ފަހަތުގައި ތިބި ހަގީގީ ބަޠަލުންނަކީ މަންމައިން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ފާހަގަކުރާ ބައިނަލްއަޤްވާމީ މަންމައިންގެ ދުވަހުގެ މުނާސަބަތުގައި ފޮނުއްވި ތަހުނިޔާގެ މެސެޖުގައެވެ.

ރައީސުލްޖުމްހޫރިއްޔާ މީސްމީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، މަންމައިންގެ ދުވަސް ހަނދާންކޮށްދެނީ އެންމެ އަގުހުރި ޤުރުބާނީ، މައިވަންތަކަމުގެ ލޯބިކަމަށެވެ. އަދި މި އުފާވެރި ދުވަހުގެ ތަހުނިޔާ މަންމައިންނަށް ފޮނުވަނީ ހެޔޮ ދުޢާތަކާ އެކު ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ބައިނަލްއަޤްވާމީގޮތުން ފާހަގަކުރާ މަންމައިންގެ ދުވަސް ކޮންމެ އަހަރަކުވެސް ފާހަގަކުރަނީ މެއި މަހުގެ 11 ވަނަ ދުވަހުއެވެ. މި ދުވަސް ފާހަގަކުރަނީ މައިވަންތަ ލޯތްބާއި މައިވަންތަ ގުޅުންތަކާއެކު ހަރުދަނާ ދަރިންތަކެއް ބިނާކޮށް، ޤައުމުގެ ކުރިއެރުމުގައި މަންމައިންގެ ކުރާ އަގުހުރި ދައުރު ފާހަގަކޮށް، އެކަމުގެ އަގުވަޒަން ކުރުމުގެ ގޮތުންނެވެ.

މިއަދުގެ ދިވެހި މުޖުތަމަޢުގައި އެންމެ ދަތި ޙާލު ތަހައްމަލުކުރަމުންދާ އެއް ބަޔަކީ އެކަނިވެރި މައިންކަން ފާހަގަކުރެވެއެވެ. މިކަމާ ގުޅިގެން، އެ ފަރާތްތަކަށް ދިމާވާ ތަކުލީފުތަކަށް ތަސައްލީއެއް ހޯއްދަވާދެއްވުމަށް ސަރުކާރުން ދޭ އިނާޔަތް ބޮޑު ކުރުމަކީ ރައީސްގެ ވަޢުދެއްކަން ފާހަގަކޮށްލެވެއެވެ.