ޕާކިސްތާނާއި އިންޑިއާ އާ ދެމެދު ބަދަލުކުރަމުންދިޔަ ޙަމަލާތައް ހުއްޓާލުމަށް އެއްބަސްވުމަކަށް އާދެވިއްޖެ ކަމަށް އެމެރިކާއިން ބުނެފިއެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި ދެ ގައުމުން ވަނީ "ވަގުތުން ހަނގުރާމަ ހުއްޓަލުމަށް” ފުރިހަމަ އެއްބަސްވުމަކަށް އައިސްފައެވެ. މި އެއްބަސްވުމާއި ހަމަޔަށް އާދެވުނީ އެމެރިކާ، އިނގިރޭސިވިލާތް، ސައޫދީ އަރަބިއްޔާ އަދި ތުރުކީގެ އެހީތެރިކަމާއެކު ކުރެވުނު މަޝްވަރާތަކަކަށް ފަހުގައެވެ.
މި ހަނގުރާމަ ފެށުނީ އޭޕްރިލް 22 ގައި ކަޝްމީރުގައި ހިނގި ޓެރަރިސްޓް ޙަމަލާއަކާ ގުޅިގެންނެވެ. އޭގެ ފަހުން ވޭތުވެދިޔަ ހަފްތާގައި ދެ ގައުމުގެ މެދުގައި ޙަމަލާތައް ބަދަލުކުރުން އިތުރުވެގެން ދިޔައެވެ. އެންމެ ތިން ދުވަހުގެ ތެރޭގައި ޕާކިސްތާނުން ވަނީ 300 އަށް ވުރެ ގިނަ ޑްރޯން އަދި 20 ކްރޫޒް މިސައިލް އިންޑިއާގެ އަސްކަރީ އަދި ރާޑާރ ތަންތަނަށް އަމާޒުކޮށް ފޮނުވާލާފއެވެ. އެއީ އިންޑިއާއިން "އޮޕަރޭޝަން ސިންދޫރު" ގެ ނަމުގައި ޕާކިސްތާނުގެ ރަވަލްޕިންޑީ، ޖަންގް އަދި ސިންދު ސަރަޙައްދުތަކުގައި ހުރި އެއަރބޭސްތަކަށް އަމާޒުކޮށް ގިނަ އަދަދެއްގެ މިސައިލްތަކާއި ޑްރޯންތައް ފޮނުވާލުމާއި ގުޅިގެންނެވެ.
މިހާތަނަށް މި ހަމަލާތަކުގައި 58 މީހުން މަރުވެފައިވާ ކަމަށް ވަނީ ރިޕޯޓުކޮށްފައެވެ. އޭގެ ތެރޭގައި 11 އާންމު ރައްޔިތުންނާއި 47 ސިފައިން ހިމެނެއެވެ. އަދި މި ހަމަލާތަކުގެ ސަބަބުން ދެ ގައުމަށް ޖުމްލަ 3.2 ބިލިއަން ޑޮލަރުގެ ގެއްލުން ވެފައިވާ ކަމަށް ވެއެވެ. އޭގެ ތެރެއިން އިންޑިއާއަށް 1.8 ބިލިއަން ޑޮލަރުގެ ގެއްލުން ވެފައިވާއިރު، ޕާކިސްތާނަށް 1.4 ބިލިއަން ޑޮލަރުގެ ގެއްލުން ވެފައިވާ ކަމަށް ވަނީ ބުނެފައެވެ.
ހަނގުރާމަ ހުއްޓާލުމަށް އެއްބަސްވުމާ ގުޅިގެން ޕާކިސްތާނުން ވަނީ އެ ގައުމުގެ އެއަރސްޕޭސް ވެސް މިހާރު ހުޅުވާލާފައެވެ. ނަމަވެސް އިންޑިއާއިން ވަނީ މެއި 23 އާ ހަމައަށް ޕާކިސްތާނުގެ މަތިންދާބޯޓުތަކަށް އެ ގައުމުގެ އެއަރސްޕޭސް ބޭނުންކުރުން މަނާކޮށްފައެވެ. އަދި އިންޑިއާގެ އުތުރުގައި ހުރި 32 ވައިގެ ބަނދަރު މެއި 15 އާ ހަމައަށް ބަންދުކުރުމަށް ނިންމާފައިވެއެވެ.
ދެ ގައުމުގެ ސަރުކާރުތަކުން ވަނީ ހޯމަ ދުވަހު ޑިޕްލޮމެޓިކް މަޝްވަރާތައް އަލުން ފެށުމަށް އެއްބަސްވެފައެވެ.
