އިންޑިއާ އާއި ޕާކިސްތާނާ ދެމެދުގައި މިހާރު ހިނގަމުންދާ ހަމަނުޖެހުންތަކާ ގުޅިގެން ޕާކިސްތާނުގައި ތިބި ދިވެހިންގެ ހާލަތު ވަރަށް ގާތުން ބަލަމުން އަންނަ ކަމަށް ފޮރިން މިނިސްޓްރީން މިއަދު ބުނެފި އެވެ.
ފޮރިން މިނިސްޓްރީން ބުނީ ޕާކިސްތާނުގެ އެކި ސަރަހައްދުތަކުގައި ކިޔަވަމުން އަންނަ ދިވެހި ދަރިވަރުންގެ ހާލު މިނިސްޓްރީ އާއި ޕާކިސްތާނުގައި ހުންނަ ރާއްޖޭގެ ހައިކޮމިޝަނުން ވަރަށް ގާތުން ބަލަމުން އަންނަ ކަމަށެވެ.
ޕާކިސްތާނުގައި މިވަގުތު ތިބި ދިވެހިންގެ ރައްކާތެރިކަން ކަށަވަރުކުރުމަށް މިނިސްޓްރީން ކުރަން ޖެހޭ އެންމެހާ މަސައްކަތްތައް ކުރަމުން އަންނަ ކަމަށާއި ޕާކިސްތާނުގެ މަޝްރަހު މިހާރަށް ވުރެ ގޯސްވާ ނަމަ، އެ ގައުމުގައި ތިބި ދިވެހިންނަށް އެހީތެރިކަން ފޯރުކޮށްދޭނެ ކަމުގެ ޔަގީންކަން ދޭ ކަމަށް ވެސް މިނިސްޓްރީން ބުންޏެވެ.
މިނިސްޓްރީން ބުނީ ޕާކިސްތާނުގައި ކިޔަވާ މަރުކަޒުތަކާއި އޮފީސްތައް، އާންމު ހާލަތުގައި މި ވަގުތު މަސައްކަތްކުރަމުން އަންނަ ކަމަށް އެ ގައުމުގެ ކަމާ ބެހޭ އިދާރާތަކުން، ޕާކިސްތާނުގައި ހުންނަ ރާއްޖޭގެ ހައިކޮމިޝަނަށް މައުލޫމާތު ދީފައިވާ ކަމަށެވެ.
މި ދަނޑިވަޅުގައި ޕާކިސްތާނުގައި ދިރިއުޅޭ އަދި އެ ގައުމަށް ދަތުރުފަތުރު ކުރާ ހުރިހާ ދިވެހިންގެ ސަލާމަތާއި ރައްކާތެރިކަމަށް ހާއްސަ އަހައްމިއްޔަތުކަމެއް ދީ، ޕާކިސްތާނުގެ ސަރުކާރާއި ޕާކިސްތާނުގައި ހުންނަ ރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށް އިލްތިމާސްކުރާ ކަމަށް ވެސް މިނިސްޓްރީން ބުންޏެވެ.
ޕާކިސްތާނުގައި ދިރިއުޅޭ ދިވެހިންނަށް ދިމާވާ ކަންކަމުގައި ޕާކިސްތާނުގައި ހުންނަ ރާއްޖޭގެ ހައިކޮމިޝަނަށް ނުވަތަ އެ މިނިސްޓްރީގެ ހޮޓްލައިނަށް ގުޅުމަށް ފޮރިން މިނިސްޓްރީން ވަނީ އެދިފަ އެވެ.
ޕާކިސްތާނުގައި ހުންނަ ރާއްޖޭގެ ހައިކޮމިޝަނަށް ގުޅޭނެ ނަންބަރު: 923008504143 +
ފޮރިން މިނިސްޓްރީގެ ހޮޓްލައިން ނަންބަރު: 7983400
