މާލޭގެ އިމާރާތެއްގެ މަތިން ވެއްޓުނު ހައްވާ ޔުމްނު ރަޝީދުގެ މައްސަލައާ ގުޅޭ އެއްވެސް މައުލޫމާތެއް ނުވަތަ ފޮޓޯއެއް ލިބިފައިވާ ނަމަ, އެ މައްސަލަ ބަލަން އުފައްދާފައިވާ ކޮމިޝަނާ އެ މައުލޫމާތު ހިއްސާކުރަން ހާއްސަ އޮންލައިން ޕޯޓަލް މިއަދު ތައާރަފުކޮށްފި އެވެ.
ރިޔާސީ ކޮމިޝަނުން އެކްސްގައި ކުރި ޕޯސްޓެއްގައި ބުނީ މިދިޔަ މަހުގެ 18 ވަނަ ދުވަހު މާލޭގައި ހިނގި އެ ހާދިސާއާ ގުޅޭ ގޮތުން، އެއްވެސް މަޢުލޫމާތެއް. ފޮޓޯ/ވީޑިއޯ ނުވަތަ އެ ނޫން ވެސް އެއްވެސް ލިޔުމެއް އެ ކޮމިޝަނާ ހިއްސާކުރަން ބޭނުންވާ ނަމަ ނުވަތަ އެ ކޮމިޝަނުގެ މަސައްކަތާ ގުޅޭ ގޮތުން އެއްވެސް ސުވާލެއްކުރަން ބޭނުންވާ ނަމަ އެ ޕޯޓަލް މެދުވެރިކޮށް އެކަން ކުރެވޭނެ ކަމަށެވެ.
Advertisement
ޔުމްނު ވެއްޓުނު މައްސަލަ ބަލަން ރައީސް ޑރ. މުހައްމަދު މުއިއްޒު މިދިޔަ މަހުގެ 26 ވަނަ ދުވަހުގެ ރޭ ތިން މެމްބަރުންގެ ހާއްސަ ކޮމިޝަނެއް އުފެއްދެވީ އެ މައްސަލައާ ގުޅިގެން އާންމުންގެ ހުރި ކަންބޮޑުވުންތައް ގިނަވުމުން, ދެފުށްފެންނަ ގޮތެއްގައި އެ މައްސަލައިގެ މިނިވަން, ރަނގަޅު ތަހުގީގެއް ހިންގުމަށެެވެ.
އެ ކޮމިޝަނުގައި ތިއްބަވަނީ ކުރީގެ ބަންޑާރަ ނައިބު، މުހައްމަދު މުނައްވަރާއި ބްރިގޭޑިއާ ޖެނެރަލް ރިޓަޔަޑް އަހުމަދު މުހައްމަދާއި ޑރ. މޫސާ މުރާދާއި ޖަބީން މުހައްމަދު އަދި އާމިނަތު އީނާސެވެ.
އެ ކޮމިޝަނުން މިދިޔަ މަހުގެ 30 ވަނަ ދުވަހު ބޭއްވި ފުރަތަމަ ނޫސްވެެރިންގެ ބައްދަލުވުމުގައި ކޮމިޝަންގެ ރައީސް ޑރ. މުނައްވަރު ވިދާޅުވެފައި ވަނީ އަމާޒަކީ އިންސާފަށް ވާސިލްވުމެވެ.
