މިއަހަރުގެ ކުޑަކުދިންގެ ދުވަސް (މެއި 10) މުޅި ރާއްޖޭގައި ފާހަގަކުރުމަށް ނިންމައިފި ކަމަށް ތައުލީމީ ބުޒާރާއިން ބުނެފިއެވެ.
އެ ވުޒާރާއިން ބުނީ ހުރިހާ ސްކޫލަކަށްވެސް އެހީ ފޯރުކޮށްދީގެން މި ދުވަސް ފާހަގަކުރުމަށް ހަމަޖެހިފައިވާ ކަމަށާއި، މާލޭގެ 5 ސަރަޙައްދެއްގައި ޚާއްސަ ހަރަކާތްތަކެއް ކުރިއަށްގެންދިޔުމަށް ވަނީ ނިންމާފައެވެ.
ތަޢުލީމީ ވުޒާރާގެ ސްޓޭޓް މިނިސްޓަރ ޙުސައިން ސަޢީދު މުޙައްމަދު ވިދާޅުވީ، މިއީ ފުރަތަމަ ފަހަރަށް ޤައުމީ ފެންވަރުގައި ކުޑަކުދިންގެ ދުވަސް ފާހަގަކުރުމަށް އެ ވުޒާރާއިން އިސްނަގައިގެން ކުރާ މަސައްކަތެއް ކަމަށެވެ. މިއަހަރުގެ އަމާޒަކީ ކުދިންނާއި އެކުދިންގެ އާއިލާވެސް ހިމަނައިގެން ވަރަށް ފުޅާ ދާއިރާއެއްގައި މި ދުވަސް ފާހަގަކުރުން ކަމަށް އެމަނިކުފާނު ވިދާޅުވިއެވެ.
މާލޭ ސަރަޙައްދުގައި ކުޑަކުދިންގެ ދުވަސް ފާހަގަކުރުމަށް ހަމަޖެހިފައިވާ 5 ސަރަޙައްދަކީ:
- ހުޅުމާލެ ސެންޓްރަލް ޕާކް
- މުހިޔިއްދީން ސްކޫލް
- ރަސްފަންނު
- ހެންވޭރު ދަނޑު
- ޖުމްހޫރީ މައިދާން (އިސްލާމީ މަރުކަޒު ސަރަޙައްދު)
މި ހަރަކާތްތަކުގައި ކުޑަކުދިންނާއި ގުޅޭ ޝަޢުގުވެރި ތަޢުލީމީ ހަރަކާތްތަކާއި، މަޖާ ކުޅިވަރުތަކުގެ އިތުރުން މުނިފޫހިފިލުވުމުގެ ހަރަކާތްތައް ހިމެނޭނެ ކަމަށް ތަޢުލީމީ ވުޒާރާއިން ވިދާޅުވިއެވެ. އަދި ރާއްޖޭގެ ހުރިހާ ސްކޫލެއްގައި ވެސް ކުޑަކުދިންގެ ދުވަސް ފާހަގަކުރުމުގެ ހަރަކާތްތައް ކުރިއަށް ގެންދާނެ ކަމަށާއި، މީގެ ތެރޭގައި ޚާއްސަ އެސެމްބްލީތަކާއި އެހެނިހެން ހަރަކާތްތައް ހިމެނޭނެ ކަމަށް ވިދާޅުވިއެވެ.
ތަޢުލީމީ ވުޒާރާއިން ވިދާޅުވީ މި ހަރަކާތްތައް ކުރިއަށް ގެންދާނީ ކްލާސްރޫމްތަކުގައި ކިޔަވައިދޭ ގަޑިތައް ނުގެއްލޭ ގޮތަށް ކަމަށެވެ. އަދި މިއަހަރުގެ ތަޖުރިބާއަށް ބެލުމަށްފަހު ކުރިއަށް އޮތް އަހަރުތަކުގައި މި ދުވަސް ފާހަގަކުރުން އިތުރަށް ފުޅާކުރުމަކީ އެ ވުޒާރާގެ އަމާޒެއް ކަމަށްވެސް ވިދާޅުވިއެވެ.
ބައިނަލް އަޤްވާމީ ގޮތުން ފާހަގަކުރާ ކުޑަކުދިންގެ ދުވަހަކީ ކޮންމެ އަހަރެއްގެ ވެސް މެއި މަހުގެ 10 އެވެ.
