ޕާކިސްތާނާއި ޕާކިސްތާނުގެ ވެރިކަންކުރާ ކަޝްމީރުގައި ޓެރަރިސްޓް ކަމަށް ތުހުމަތު ކުރެވޭ ތަންތަނަށް އަމާޒުކޮށްގެން އިންޑިއާއިން ރޭ ދަންވަރު ހިންގި "އޮޕަރޭޝަން ސިންދޫރު" އާ ގުޅިގެން ދެޤައުމުންވެސް ގިނަ ބަޔަކު މަރުވެއްޖެއެވެ.
މަސްދަރުތަކުން ބުނާ ގޮތުގައި މިހާތަނަށް 60 މީހުން މަރުވެފައިވާއިރު، ޕާކިސްތާނުން ރިޕޯޓްކޮށްފައިވާ ގޮތުގައި އިންޑިއާގެ ހަމަލާތަކުގައި ކުޑަކުއްޖަކު ހިމެނޭ ގޮތަށް މަދުވެގެން 26 އާންމުން މަރުވެ، 46 މީހަކު ޒަހަމްވެފައިވެ އެވެ.
ނައެއް ރިޕޯޓްތަކުން ބުނަނީ ބަދަލު ހިފުމުގެ ގޮތުން ޕާކިސްތާނުން ދިން ޙަމަލާތަކުގައި އިންޑިއާގެ 11 މީހުން މަރުވެ، 49 މީހުން ޒަހަމްވެފައިވާ ކަމަށެވެ.
Advertisement
އިންޑިއާގެ ހަމަލާތަކަކީ އޭޕްރީލް މަހުގެ 22 ވަނަ ދުވަހު ޕަހަލްގަމްގައި ދިން ހަމަލާގައި 26 ޓޫރިސްޓުން މަރުވެފައިވާތީވެ ރައްދު ދިނުމުގެ ގޮތުން ދިން ހަމަލާ ކަމަށް އެޤައުމުން ބުނެއެވެ.
އިންޑިއާއިން ބުނާ ގޮތުގައި އެ ޤައުމުގެ އޮޕަރޭޝަންގައި ބޮޑަށް ޓާގެޓް ކޮށްފައި ވަނީ ލަޝްކަރު-އޭ-ތައިބާ އާއި ޖައިޝް-އެ-މުހައްމަދު ފަދަ ހަތިޔާރު އެޅި ޖަމާއަތްތަކާ ގުޅިފައިވާ ޓެރަރިސްޓް އިންފްރާސްޓްރަކްޗަރ ރޫޅާލުމަށެވެ
ބަދަލު ހިފުމުގެ ގޮތުން ޙަމަލާދިން ޕާކިސްތާނުން ބުނީ އެމީހުން ދިން ޙަމަލާގައި އިންޑިއާގެ ފަސް ފައިޓަރ ޖެޓް ވައްޓާލައި ޑްރޯނެއް ވެސް ވައްޓައިލި ކަމަށެވެ. އޭގެ ތެރޭގައި ތިން ރާފަލް، އެއް ސޫ-30އެމްކޭއައި، އަދި އެއް މިގް-29 ގެ އިތުރުން އައިއޭއައި ހެރޮން ޑްރޯން ވެސް ހިމެނޭ ކަމަށެވެ. މީގެ އިތުރުން ޕާކިސްތާނުން ވަނީ އިންޑިއާގެ ބްރިގޭޑްގެ މައި މަރުކަޒަކާއި އެތައް ޗެކްޕޯސްޓެއް ހަލާކުކޮށްލާފައިވާ ކަމަށް ވެސް ރިޕޯޓްކޮށްފައެވެ. މިކަން އިންޑިއާއިން ދޮގު ކޮށްފައެއް ނުވާއިރު ޕާކިސްތާނުން ބުނަނީ ރަނގަޅު ދަނޑިވަޅުގައި އިންޑިއާގެ ފަރާތުން އަދިވެސް ބަދަލު ހިފާނެ ކަމަށެވެ..
އިންޑިއާގެ ހަމަލާތަކަކީ "ހަނގުރާމައިގެ އަމަލެއް" ކަމަށް ބުނެ ޕާކިސްތާނުން އެކަން ކުށްވެރިކޮށްފައި ވާއިރު، ޙަމަލާގެ ސަބަބުން ވައިގެ ސަރަހައްދު ބަންދުވެ ފްލައިޓްތައް ކެންސަލް ވެފައި ވެއެވެ.
