ސޯވިއެޓް ޔޫނިއަނުގގެ ޒަމާނުގެ ބޮޑު ޖައްވީ އުޅަނދެއް ޓެކްނިކަލް މައްސަލައެއް ދިމާވެ މިސްރާބުން ނެއްޓި، ބިމަށް ވެއްޓެނީއެވެ. މިކަމާއި ގުޅިގެން ދުނިޔޭގެ އެކި ކަންކޮޅުތަކުގައި ކަންބޮޑުވުން އުފެދެމުންދެއެވެ.
ކޮސްމޮސް 482 ގެ ނަމުގައި މަޝްހޫރު ވެފައިވާ މި އުޅަނދު މި މަހުގެ 10 ވަނަ ދުވަހާ ހިސާބުގައި ބިމަށް ވެއްޓޭނެ ކަމަށް ސައެންސްވެރިން ލަފާކުރެވެއެވެ. މިއީ 1972 ވަނަ އަހަރު ވީނަސް އަށް ދަތުރުކުރުމަށް ފޮނުވި އުޅަނދެކެވެ. 50 އަހަރަށް ވުރެ ގިނަ ދުވަހު އެ އުޅަނދު ދިޔައީ ދުއްވަމުންނެވެ.
ސައެންސްވެރިން ލަފާކުރާ ގޮތުގައި މިހާރު މި އުޅަނދު ވެއްޓޭނެ ކަމަށް ލަފާ ކުރެވެނީ ތުރުކީވިލާތު ސަރަހައްދަށް ނުވަތަ ސީރިއާ އާއި މިޞްރު ފަދަ މެދުއިރުމަތީގެ ޤައުމުތަކުގެ ސަރަހައްދަށެވެ.
ގާތްގަނޑަކަށް 500 ކިލޯގްރާމުގެ ބަރުދަން ހުރި މި އުޅަނދު ފަރުމާކޮށްފައިވަނީ ވީނަސްގެ ހޫނުން އަނދައި ހުލިނުވާނެ ގޮތަށެވެ.
މާހިރުން ބުނާ ގޮތުގައި މި އުޅަނދު މީހުން ދިރިއުޅޭ ސަރަޙައްދަކަށް ވެއްޓުމުގެ ފުރުޞަތު ކުޑަ ނަމަވެސް، އެކަން ވުމުގެ ފުރުޞަތު އެއްކޮށް ނަފީއެއް ނުކުރެވެއެވެ. މި މަތިންދާބޯޓު ވެއްޓިދާނެ ކަމަށް ލަފާކުރެވޭ ސަރަޙައްދަކީ އުތުރުން 51.7 ޑިގްރީ އާއި ދެކުނުން 51.7 ޑިގްރީއާ ދެމެދުގެ ސަރަޙައްދެވެ. މިއީ މިލިއަން އަކަ ކިލޯމީޓަރުގެ ސަރަޙައްދެކެވެ. މީގެ ތެރޭގައި އޭޝިއާ، އެފްރިކާ އަދި ދެކުނު އެމެރިކާގެ އާބާދީ ބޮޑެތި ސަރަޙައްދުތައް ހިމެނެއެވެ.
މި އުޅަނދު އަންނާނީ ގަޑިއަކު 150 މޭލުގެ ބާރުމިނުގައި ކަމަށް ލަފާކުރެވެއެވެ. އަދި ފަހުން ނެގުނު ސެޓެލައިޓް ފޮޓޯތަކަށް ބަލާއިރު، މި އުޅަނދުގެ ޕެރަޝޫޓް ސިސްޓަމްގެ ބައެއް ބައިތައް މިހާރުވެސް ހުޅުވިފައި ހުރެދާނެ ކަމަށް ބައެއް މާހިރުން ޤަބޫލުކުރެއެވެ. ނަމަވެސް މީގެ އުމުރާއި ޙާލަތަށް ބަލާއިރު، މީގެ ރައްކާތެރިކަމުގެ ނިޒާމުތައް މަސައްކަތްކުރާނެކަން ޔަޤީނެއް ނޫނެވެ.
