އިސްލާމިކް ސޯޝަލް ފައިނޭންސިންގެ ބޮޑު މަޝްރޫއެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު އިފްތިތާހުކޮށްފި އެވެ.

މޯލްޑިވްސް ސޯޝަލް އިސްލާމިކް ފައިނޭންސް އިނީޝިއޭޓިވް (މިފްސީ)ގެ ނަމުގައި އެ މަޝްރޫއު ފެށީ މިއަދު ހެނދުނު ކުރުނބާ މޯލްޑިވްސް ރިސޯޓުގައި ބޭއްވި ރަސްމިއްޔާތެއްގަ އެވެ. އެ މަޝްރޫއު ފައްޓަވައިދެއްވީ ރައީސް ޑރ. މުހައްމަދު މުއިއްޒެވެ.

އެ ބޮޑު މަޝްރޫއުގައި ގައުމީ ބޭންކް, ބީއެމްއެލް އާއި އެމްއައިބީން ބައިވެރިވެ އެވެ.

އެމްއެމްއޭ އިން ބުނީ އެ މަޝްރޫއުގެ ދަށުން ބީއެމްއެލްއިން ކުރިއަށް އޮތް ތިން އަހަރު ދުވަހުގެ ތެރޭގައި މުޖުތަމައުގެ ހާއްސަ އެހީތެރިކަން ބޭނުންވާ މީހުންނަށް 200 މިލިއަން ރުފިޔާގެ ފައިނޭންސް ދޫކުރާނެ ކަމަށެވެ. އަދި އެމްއައިބީން 30 މިލިއަން ރުފިޔާ އަދި އެ އޮތޯރިޓީއިން 20 މިލިއަން ރުފިޔާގެ ފައިނޭންސް ދޫކުރާނެ ކަމަށް އެމްއެމްއޭ އިން ބުންޏެވެ.

"މިފްސީ"ގެ ދަށުން އަންހެނުންނާއި މުޖުތަމައުގައި ހާއްސަ އެހީތެރިކަން ބޭނުންވާ މީހުންނަށާއި އިސްލާމީ އެކިއެކި ހާއްސަ މަސައްކަތްތަކަށް ވެސް މާލީ އެހީތެރިކަން ލިބޭނެ އެވެ.

އެ ރަސްމިއްޔާތުގައި އެމްއެމްއޭގެ ގަވަރުނަރު އަހްމަދު މުނައްވަރު ވިދާޅުވީ ކުރިއަށް އޮތް 10 އަހަރު ދުވަހުގެ ތެރޭގައި ރާއްޖެއަކީ އިސްލާމިކް ފައިނޭންސްގެ ދާއިރާގައި މި ސަރަހައްދުގެ ހަބަކަށް ހެދުމަށް ހާއްސަ އިސްކަމެއް ދެއްވާނެ ކަމަށެވެ. އަދި ރާއްޖޭގައި އިސްލާމިކް ފައިނޭންސް ފުޅާކުރުމަށް އެމްއެމްއޭ އިން 2025-2027 ވަނަ އަހަރުގެ ސްޓްރެޓެޖިކް ޕްލޭންގެ ދަށުން ނިންމާފައިވާ ކަމަށް ވެސް އޭނާ ވިދާޅުވި އެވެ.

"އެމްއެމްއޭ ތަންވީލް ޕްރޮޖެކްޓް މިހާރު ވަނީ ފަށައިފައި. އޭގެ ބޭނުމަކީ އާންމުން ހޭލުންތެރިކޮށް، އިންސްޓިޓިއުޓްތަކުގެ ކެޕޭސިޓީ އިތުރުކުރުމަށް މަސައްކަތް ކުރުން," މުނައްވަރު ވިދާޅުވި އެވެ.

މުނައްވަރު ވިދާޅުވި ގޮތުގައި "މިފްސީ" އަކީ މެލޭޝިއާގެ "ސަދަގާ ހައުސް ބޭންކް އިސްލާމް" އަސްލަކަށް ބަލައިގެން ފަރުމާކޮށްފައިވާ މަޝްރޫއެކެވެ. މި މަޝްރޫއު ފެށުމަށް މެލޭޝިއާގެ ޔުނިވަސިޓީ އިސްލާމިކް ސެލެންގޯއާ ގުޅިގެން އެމްއެމްއޭ އިން ވަނީ ދިރާސާތަކެއް ކޮށްފަ އެވެ.