މި ސަރުކާރުން ފަށާ ޓެކްސީ ލައިނަކީ ރައްޔިތުންނަށް ބޮޑު ލުޔެއް ގެނެސްދޭނެ ނަމޫނާ ހިދުމަތަކަށް ވާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދު ޖަލްސާގައި މެމްބަރުން ކުރެއްވި ސުވާލުތަކަށް ދެއްވި ޖަވާބުގައި އަމީން ވިދާޅުވީ ސަރުކާރުން ފަށާ ޓެކްސީ ލައިންގެ ހިދުމަތުގެ ސަބަބުން ޓެކްސީ ކުރާ އަމިއްލަ ފަރާތްތަކުން ދޭ ހިދުމަތަށް އެއްވެސް ހުރަހެއް ނެތް ކަމަށާއި އެ ފަރާތްތަކަށް ގެއްލުން ނުވާނެ ކަމަށެވެ.
ސަރުކާރުން ޓެކްސީ ހިދުމަތުގެ ތެރެއަށް ވަންނަން ނިންމި އެންމެ ބޮޑު އެއް ސަބަބަކީ، ރައްޔިތުން ބޭނުންވާ ކަހަލަ ހިދުމަތެއްގެ ގޮތުގައި ޓެކްސީ ހިދުމަތް މިހާރު ލިބެމުން ނުދިއުން ކަމަށާއި ސަރުކާރުން ތައާރަފު ކުރާ ޓެކްސީ ލައިނާ އެކު، ނަމޫނާ ޓެކްސީގެ ހިދުމަތެއް ފެނިގެންދާނެ ކަމަށް އަމީން ވިދާޅުވި އެވެ.
އަމީން ވިދާޅުވީ ޓެކްސީ ނުލިބޭ މައްސަލަ އާއި ރައްޔިތުން ބޭނުންވާ ކަހަލަ ހިދުމަތެއް ނުލިބޭ ކަމުގެ ޝަކުވާ ރައްޔިތުންގެ ފަރާތުން އަބަދުވެސް އެ މިނިސްޓްރީއަށް ލިބެމުންދާ ކަމަށެވެ. ބައެއް ޓެކްސީ ޑްރައިވަރުން އެމީހުން ބޭނުން ވަގުތެއްގައި, އެމީހުން ދާން ބޭނުންވާ ތަނަކަށް އެކަނި ނޫނީ ދަތުރުތައް ނުނަގާ މައްސަލައަކީ ދިރާސާއެއް ނުކުރި ނަމަވެސް، ފެންނަން އޮތް ހަގީގަތެއް ކަމަށް އަމީން ވިދާޅުވި އެވެ.
އަމީން ވިދާޅުވީ ސަރުކާރުން އާރްޓީއެލް ބަހުގެ ހިދުމަތް ފެށި ދުވަސްވަރު ވެސް ޓެކްސީ ޑްރައިވަރުން އެކަމާ އިހުތިޖާޖުކޮށް, ކަންބޮޑުވުން ފާޅުކުރި ކަމަށެވެ. ނަމަވެސް މިއަދު އާރުޓީއެލްގެ ހިދުމަތް ދުވާލަކު 27,000 އެއްހާ މީހުން ބޭނުންކުރާއިރު، އެކަމުން ވެސް ޓެކްސީ ހިދުމަތަށް އަސަރެއް ކޮށްފައި ނެތް ކަމަށާއި އެކަމުން ރައްޔިތުންނަށް ލިބުނު ފައިދާ މާ ބޮޑު ކަމަށް އަމީން ވިދާޅުވި އެވެ.
"ފެންނަން އޮތް ހަގީގަތަކީ މާލޭގައި ބޭނުންވާ ގޮތަށް ޓެކްސީ ހިދުމަތް ނުދެވޭކަން," އަމީން ވިދާޅުވި އެވެ.
"މިނިސްޓްރީއަށް ގިނަ ޝަކުވާ ލިބޭ. މާލެ ތެރެއަށް ޓެކްސީ ނުލިބުމާއި ހަމައެކަނި ހުޅުލެ އާއި ހުޅުމާލެއަށް ދާން ޓެކްސީ ދަތުރު ނަގާ ވާހަކަ. ސަރުކާރުން ހިދުމަތް ފަށާއިރު މާލެ ތެރޭގައި ދުއްވަން ފަސޭހަ ސައިޒުން ކުދި އުޅަނދު ވެސް ގެންނާނެ."
ސަރުކާރުގެ ޓެކްސީ ލައިންގައި ބޭނުންކުރާނީ 100 ޕަސެންޓް ތިމާވެއްޓާއި ރަށްޓެހި އުޅަނދުތަކެވެ. އޭގެ ތެރޭގައި ތިން ސައިޒެއްގެ ވެހިކަލް ހިމެނޭ އެވެ. އަދި 24 ގަޑިއިރު އެ ހިދުމަތް ދިނުމަށް ދާއިމީ ވަޒީފާގެ ގޮތުގައި ޑްރައިވަރުން ނަގަން ވަނީ ނިންމައިފަ އެވެ. އަދި ޕާޓް-ޓައިމްކޮށް ޓެކްސީ ދުއްވަން ބޭނުންވާ ޑްރައިވަރުންނަށް އެ ފުރުސަތު ދޭން ވެސް ވަނީ ނިންމައިފަ އެވެ.
