މާލެ ޓެކްސީ ލައިން (އެމްޓީއެލް) މޮބައިލް އެޕްލިކޭޝަނަށް އާންމުން ހޭލުންތެރިކުރުވުމަށާއި، އެ އެޕް ބޭނުންކުރާނެ ގޮތް ދަސްކޮށްދިނުމަށް ހާއްސަ ހަރަކާތެއް މިއަދު މާފަންނު ބަސް ޓާމިނަލްގައި އެމްޓީސީސީން ބާއްވައިފިއެވެ.

މި ހަރަކާތުގެ ތެރެއިން އެމްޓީސީސީގެ ޓީމުތަކުން ވަނީ އާންމުންނާ ބައްދަލުކޮށް، އެޕް މެދުވެރިކޮށް ޓެކްސީ ބުކް ކުރާނެ ގޮތާއި، ދަތުރުތައް ކުރިއަށް ރޭވުމާއި (ޝެޑިއުލް ކުރުން)، އަދި ފައިސާގެ މުއާމަލާތްތައް ފަސޭހަކަމާއެކު ޑިޖިޓަލްކޮށް ކުރިއަށް ގެންދާނެ ގޮތުގެ މައުލޫމާތު ދީފައެވެ. މި ސެޝަންގައި އެޕްގެ މުހިންމު ފީޗާތަކުގެ ތެރޭގައި ހިމެނޭ ލައިވް ޓްރެކިންގ، 24 ގަޑިއިރުގެ ކަސްޓަމަރު ސަޕޯޓް، އަދި ކުއްލި ހާލަތްތަކުގައި ބޭނުންކުރާ އެސްއޯއެސް (SOS) ފީޗާގެ މައުލޫމާތު ހިމެނޭ ބެނާތައް ބޭނުންކޮށްފައިވެއެވެ. މީގެ އިތުރުން، އެޕް ސްޓޯރާއި ގޫގުލް ޕްލޭ ސްޓޯރުން އެޕްލިކޭޝަން ޑައުންލޯޑް ކުރެވޭނެ ކިއުއާރު ކޯޑް ހިމެނޭ ލީފްލެޓްތައް ބަހައި، އެޕް އަޅައިދިނުމުގައި އެމްޓީސީސީގެ މުވައްޒަފުން އެހީތެރިކަން ފޯރުކޮށްދީފައިވެއެވެ.

މާލެ ޓެކްސީ ލައިން އަކީ މާލެ ސަރަހައްދުގައި ދިމާވެފައިވާ ޓެކްސީގެ ދަތިކަމަށް ހައްލެއް ހޯއްދަވައިދެއްވުމަށް ސަރުކާރުން އިސްނަންގަވައިގެން، އެޕްރީލް 2026 ގައި އިފްތިތާޙްކުރެއްވި ސަރުކާރުގެ ހިދުމަތެކެވެ. އެމްޓީސީސީން ހިންގާ މި ހިދުމަތުގައި ބޭނުންކުރަނީ ތިމާވެއްޓާ ރައްޓެހި އިލެކްޓްރިކް އުޅަނދުތަކެވެ. އެޕްގެ އިތުރުން ހޮޓްލައިން ނަންބަރު 1655 އަށް ގުޅައިގެންވެސް މި ހިދުމަތް ހޯދޭނެއެވެ.

"ރައްޔިތުންގެ ޓެކްސީ" އިނީޝިއޭޓިވްގެ ދަށުން ކުރިއަށްގެންދާ މި ހޭލުންތެރިކުރުވުމުގެ ހަރަކާތްތަކަކީ ވިލިމާލެ، ވެލާނާގެ، އަދި އެހެނިހެން ބަސް ޓާމިނަލްތައް ހިމެނޭހެން މާލޭގެ އެކި ސަރަހައްދުތަކުގައި ސިލްސިލާކޮށް ކުރިއަށްގެންދާ ކެމްޕޭނެކެވެ.

އެމްޓީސީސީގެ އަމާޒަކީ ޒަމާނީ ވަސީލަތްތަކާއެކު މާލޭގެ ދަތުރުފަތުރުގެ ނިޒާމު ހަރުދަނާކޮށް، ރައްޔިތުންނަށް އިތުބާރު ހުރި އަދި ފަސޭހަ ހިދުމަތެއް ދެމެހެއްޓެނިވި ގޮތެއްގައި ފޯރުކޮށްދިނުމެވެ.