މާލޭ ސަރަޙައްދުގައި ސަރުކާރުން އަލަށް ފެށުމަށް ހަމަޖެހިފައިވާ ޓެކްސީ ލައިންގެ ހިދުމަތަށް ބޭނުންވާ ކާރުތައް ރާއްޖެއަށް ގެނައުމުގެ މަސައްކަތް މިހާރު ވަނީ ފަށާފަ އެވެ.

މި މަޝްރޫއުގެ ދަށުން ފުރަތަމަ ބުރުގައި 60 ކާރު މިހާރު ވަނީ ރާއްޖެ ގެނެސްފަ އެވެ. އަދި ދެވަނަ ޝިޕްމަންޓުގައި ހިމެނޭ 90 ކާރު މިމަހުގެ 29 ވަނަ ދުވަހު ރާއްޖެއަށް ގެނައުމަށް ވަނީ ހަމަޖެހިފަ އެވެ. މި މަޝްރޫއުގެ ދަށުން މުޅި ޖުމްލަ 150 ކާރު ހިދުމަތަށް ނެރުމަށް ސަރުކާރުން ވަނީ ނިންމާފަ އެވެ.

ސަރުކާރުގެ މި ޓެކްސީ ލައިންގެ ހިދުމަތް ރަސްމީކޮށް ފެށުމަށް ހަމަޖެހިފައިވަނީ އަންނަ އޭޕްރިލް މަހުގެ 2 ވަނަ ދުވަހު އެވެ. މި ހިދުމަތް ރައްޔިތުންނަށް ފޯރުކޮށްދޭނީ އެކަމަށްޓަކައި ހާއްސަކޮށް ތައްޔާރުކޮށްފައިވާ މޯބައިލް އެޕްލިކޭޝަނެއް މެދުވެރިކޮށެވެ. މާލޭ ސަރަހައްދުގައި ފަށާ މި ހިދުމަތަކީ 24 ގަޑިއިރު ރައްޔިތުންނަށް ލިބިގެންދާނެ ހިދުމަތެކެވެ.

މި ޓެކްސީ ލައިންގައި ބޭނުންކުރުމަށް ހަމަޖެހިފައިވަނީ ދުނިޔޭގެ މަޝްހޫރު ބްރޭންޑެއް ކަމަށްވާ "ޗަންގަން އޮޓޯމޮބިލް" ގެ ކާރުތަކެވެ. ތިމާވެއްޓާ ގުޅޭގޮތުން ސަރުކާރުން ގެންގުޅޭ ސިޔާސަތުގެ ދަށުން، މި ހިދުމަތުގައި ބޭނުންކުރާނީ %100 ތިމާވެއްޓާ ރައްޓެހި (އިލެކްޓްރިކް) އުޅަނދުތަކެކެވެ. މި ހިދުމަތުގައި ތިން ސައިޒެއްގެ އުޅަނދުތައް ބޭނުންކުރުމަށް ވަނީ ހަމަޖެހިފަ އެވެ.

މި މަޝްރޫއަކީ ސަރުކާރުން، މާލޭގެ ދަތުރުފަތުރުގެ ނިޒާމު ހަރުދަނާކޮށް، ރައްޔިތުންނަށް ލުއިފަސޭހަ އަދި އިތުބާރު ހުރި ޓެކްސީގެ ހިދުމަތެއް ފޯރުކޮށްދިނުމަށް ކުރިއަށްގެންދާ މުހިންމު މަސައްކަތެކެވެ.