ސުޕްރީމް ކޯޓުން ސަސްޕެންޑް ކޮށްފައިވާ ފަނޑިޔާރު ޑރ. އަޒްމިރަލްދާ ޒާހިރު އަދި ފަނޑިޔާރު މަހާޒް އަލީ ޒާހިރު މަޤާމުން ވަކިކުރުމުގެ މައްސަލަ ދިރާސާކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް މިއަދު ފޮނުވައިފިއެވެ.

ޖުޑީޝަލް ސަރވިސް ކޮމިޝަން (ޖޭއެސްސީ) އިން އިއްޔެ ވަނީ މި ދެ ފަނޑިޔާރުން މަޤާމުން ވަކިކުރުމަށް ފެންނަ ކަމަށް ނިންމައި މަޖިލީހަށް ފޮނުވާފައެވެ. މިއަދު މަޖިލީހުގެ ޖަލްސާގައި މި މައްސަލަ ހުށަހެޅުމަށްފަހު ވަނީ ޖުޑިޝަރީ ކޮމިޓީއަށް ފޮނުވުމަށް ފާސްކޮށްފައެވެ.

ފަނޑިޔާރުން ވަކިކުރުމުގައި ޕްރޮސެސް އެއް އޮވެއެވެ. އެ ޕްރޮސެސް ގައި ފަނޑިޔާރެއްގެ މައްސަލަ ހުށަހެޅޭ ހިސާބުން އޭނާ ވަކިކުރުމާއި ދެމެދު ރައްޔިތުންގެ މަޖިލީހުގައި ފަނޑިޔާރު ވާހަކަދައްކާކަށް ފުރުސަތު ދިނުމަކަށް ނޯވެއެވެ. ފަނޑިޔާރު ވަކިކުރުމުގެ މައްސަލަ ރައްޔިތުންގެ މަޖިލީހަށް ފޮނުވުމުގެ ކުރިން އެ މައްސަލަ ތަޙްޤީޤު ކުރާނީ ޖުޑީޝަލްސާވިސް ކޮމިޝަނުންނެވެ. އެމްޑީޕީގެ ވެރިކަމުގަ ވެސް ވަނީ ފަނޑިޔާރުން މަގާމުން ވަކިކޮށްފައެވެ. އޭރު ވެސް ރައްޔިތުންގެ މަޖިލީހުގައި ދިފާޢުގައި ވާހަކަ ދައްކާކަށް ފަނޑިޔާރުންނަށް އެއްވެސް ފުރުސަތެއް ނުދެއްވައެވެ.

ފަނޑިޔާރު އަޒްމިރަލްދާ ވަނީ މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ފޮނުއްވައި ކޮމިޓީގައި ވާހަކަދެއްކުމުގެ ފުރުސަތަކަށް އެދިވަޑައިގެންފައެވެ. އޭނާގެ ސިޓީގައި ބުނެފައިވަނީ ޖޭއެސްސީގެ ނިންމުމަކީ ޤާނޫނާ ޚިލާފަށް އަދި އަދުލު އިންސާފުގެ އުސޫލުތަކާ ޚިލާފަށް ނިންމާފައިވާ ނިންމުމެއް ކަމަށެވެ.

ޖޭއެސްސީން މި ދެ ފަނޑިޔާރުންނާ މެދު ފިޔަވަޅު އެޅުމަށް ނިންމީ އެ ކޮމިޝަނުގެ މައްސަލަ ބަލާ ކޮމިޓީގެ ރިޕޯޓަށް ބިނާކޮށެވެ. އެ ރިޕޯޓުގައި ބުނެފައިވަނީ ފަނޑިޔާރު އަޒްމިރަލްދާގެ ފިރިކަލުން ބަންދުން ދޫކޮށްލުމަށް ކްރިމިނަލް ކޯޓުގެ ފަނޑިޔާރަކަށް ނުފޫޒު ފޯރުވާފައިވާ ކަމަށެވެ.

ފަނޑިޔާރަކު މަޤާމުން ވަކިކުރެވޭނީ ޖޭއެސްސީން އެކަމަށް އެދި މަޖިލީހަށް ހުށަހެޅުމުން މަޖިލީހުގެ ތަޅުމުގައި ނަގާ ވޯޓަކުންނެވެ. މީގެ ކުރިން ވެސް ސުޕްރީމް ކޯޓުގެ ބައެއް ފަނޑިޔާރުން މިގޮތަށް ވަކިކޮށްފައިވެއެވެ.

ޖުޑިޝަރީ ކޮމިޓީން މި މައްސަލަ ދިރާސާކުރުމަށްފަހު ރިޕޯޓެއް އެކުލަވާލައި މަޖިލީހުގެ ތަޅުމަށް ހުށަހަޅާނެއެވެ. އޭގެ ފަހުން މަޖިލީހުގެ ތަޅުމުގައި ވޯޓަށް އަހައި ފަނޑިޔާރުން ވަކިކުރުމާމެދު ގޮތެއް ނިންމާނެއެވެ.