ދިވެހިރާއްޖޭގައި ޕޭޕަލް ޚިދުމަތް ތަޢާރަފުކުރުމަށް ކުރެވޭ މަސައްކަތްތައް ފުދޭވަރަކަށް ކުރިއަށް ގޮސްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އިއްޔެ ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، ޕޭޕަލް ރާއްޖެ ގެނައުމަށް ގިނަ މަސައްކަތްތަކެއް ކުރެވި، ވަރަށް ކާމިޔާބު ހިސާބަކަށް އެ މަސައްކަތް ގޮސްފައިވާ ކަމަށެވެ.

ޕޭޕަލްއަކީ ދުނިޔޭގެ އެކި ކަންކޮޅުތަކަށް ފައިސާ ފޮނުވުމާއި ފައިސާ ލިބިގަތުމަށް ބޭނުންކުރާ އެމެރިކާގެ ޕޭމަންޓް ސިސްޓަމެކެވެ. ދުނިޔޭގެ ބޮޑު މަޝްހޫރުކަމެއް ހޯދާފައިވާ މި ޕްލެޓްފޯމަށް އެކްސެސް ހޯދުމުގެ މަސައްކަތް ސަރުކާރުން ފަށާފައިވަނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ.

ޕޭޕަލް ރާއްޖެއަށް ތަޢާރަފުވުމުން، ރާއްޖޭގެ އޮންލައިން ވިޔަފާރިތަކަށާއި ފްރީލާންސް މަސައްކަތްތެރިންނަށް ބޮޑެތި ފުރުސަތުތަކެއް ހުޅުވިގެންދާނެއެވެ. މީގެ އިތުރުން، ފަތުރުވެރިންނަށް ރާއްޖޭގައި ފަސޭހައިން ޚަރަދުކުރުމުގެ ފުރުސަތު ލިބި، ފަތުރުވެރިކަމުގެ ދާއިރާއަށްވެސް ފައިދާތަކެއް ކުރާނެއެވެ.